Mbela otu na okwiitaala owala shoka tu wete?
“Omuntu ngoka ini itaala Kalunga oha dhiladhila kutya oshi li itaashi wapa okutseya oshili miinima ngaashi kombinga yaKalunga nosho wo onkalamwenyo yomonakuyiwa ndjoka omalongelokalunga gopaKriste nomalongelokalunga galwe taga longo kombinga yasho. Nenge ngele otashi wapa monakuyiwa, pethimbo lyetu oshi li oshinima itaashi wapa.”—OMUFILOSOFI BERTRAND RUSSELL OSHO A POPI NGAAKA MO 1953.
OMUNTU ngoka a tota po omukalo gwokudhiladhila ngaaka, okwa li omukonakoni gwiinamwenyo gwedhina Thomas Huxley. Huxley ngoka a valwa mo 1825 okwa li ko pethimbo lyaCharles Darwin nokwa li omuyambidhidhi gwelongo lyoevolusi. Mo1863, Huxley okwa nyola kutya kapu na uuyelele washa tawu ulike kutya oku na Kalunga ngoka “e tu hole noku na ko nasha natse ngaashi elongo lyUukriste tali ti.”
Oyendji kunena otaya tsu kumwe nomadhiladhilo gaalumentu mboka ya nwetha mo aantu oyendji, sho taya popi kutya otayi itaale owala mwaashoka taya vulu okumona. Otashi vulika taya ti kutya okukala neitaalo mugumwe nenge musha nopwaahe na uumbangi washa oshi li sha nika uusama.
Mbela Ombiimbeli otayi ti kutya otu na owala okwiitaala muKalunga nopwaahe na uumbangi washa kutya oko e li? Hasho nando. Ombiimbeli otayi ulike kutya oshi li uusama nosha nika uugoya nokuli okwiitaala shoka aantu haya popi ngele ku na uuyelele washa. Ombiimbeli otayi ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.”—Omayeletumbulo 14:15.
Ongiini kombinga yokwiitaala muKalunga? Mbela opu na uumbangi wolela tawu ulike kutya oku na Kalunga? Nongele oko e li, oku tu hole noku na ko nasha natse?
Uukwatya waKalunga owa hololwa
Omunyoli gwOmbiimbeli Paulus, sho a li ta popi nongundu yaalongwaantu Aayatena okwe ya lombwele kutya Kalunga oye “a shiti uuyuni niinima ayihe yi li mo.” Okwa lombwele aapulakeni ye mboka ya li momalimbililo kutya Kalunga oku na ko nasha naantu nosho wo kutya “ke li kokule nomuntu nando ogumwe.”—Iilonga 17:24-27.
Omolwashike Paulus a li e na uushili kutya Kalunga oko e li noku na ko nasha naantu mboka a shita? Paulus okwa holola etompelo limwe sho a li a nyolele Aakriste ooyakwawo mboka ya li muRoma. Okwa popi kombinga yaKalunga a ti: “Nando oye iha monika, okwa holola puuyelele oonkondo dhe dhaaluhe nuukalunga we. Aantu otaa vulu okukoneka Kalunga miinima mbyoka e yi shiti.”—Aaroma 1:20.
Iitopolwa tayi landula ko otayi yelitha omaukwatya gaKalunga ge li gatatu ngoka tagi imonikila sha yela miinima mbyoka a shita. Sho to konakona iitopolwa mbika, ipula to ti: ‘Okwiilonga kombinga yomaukwatya ngoka gaKalunga otashi ka guma ndje ngiini?’
[Oohapu dha simana pepandja 3]
Ombiimbeli itayi ti kutya otu na okwiitaala muKalunga nopwaahe na uumbangi washa