• Nkene tatu vulu okuninga omatokolo omawanawa
    Kala nonkalamwenyo ombwanawa sigo aluhe — Oonkundathana dhopaMbiimbeli

    • 5. Simaneka omaiyuvo gayalwe

      Aantu ohaya ningi omatokolo ga yoolokathana. Ongiini tatu vulu okuulika kutya otwa simaneka omaiyuvo gayalwe? Natu tale koonkalo mbali:

      Onkalo 1: Omumwameme gumwe ngoka e hole okugwaya omeyikapa okwa tembukile kegongalo hoka ku na aamwameme oyendji haya uvu nayi uuna ya mono gumwe e yi gwaya.

      Lesha Aaroma 15:1 nosho wo 1 Aakorinto 10:23, 24, e tamu kundathana omapulo taga landula:

      • Shi ikolelela koovelise ndhika, omumwameme ngoka otashi vulika a ninge po shike? Oto ka ninga po shike, ngele owu li nomuntu ngoka eiyuvo lye itaali mu pitike a ninge oshinima shoka eiyuvo lyoye tali ku pitike wu shi ninge?

      Onkalo 2: Omumwatate oku shi kutya Ombiimbeli inayi indika okunwa omalovu pandjele, ihe okwa tokola kee ga nwe. Okwa hiywa kokatuthi hono a mono aamwatate taya nu omalovu.

      Lesha Omuuvithi 7:16 nosho wo Aaroma 14:1, 10, e tamu kundathana omapulo taga landula:

      • Shi ikolelela koovelise ndhika, omumwatate ngoka ota vulu okuninga etokolo lini? Oto ka ninga po shike ngele gumwe ota ningi oshinima shontumba, shoka eiyuvo lyoye itaali ku pitike wu shi ninge?

      Iinima yini tayi vulu oku ku kwathela wu ninge omatokolo omawanawa?

      Omukulukadhi ta galikana.

      1. Pula Jehova e ku kwathele wu ninge etokolo lyomondjila.— Jakob 1:5.

      Omukulukadhi oye tuu ngoka ta kongo uuyelele ta longitha Ombiimbeli, iileshomwa yopaMbiimbeli nokompiuta.

      2. Ninga omapekapeko mOmbiimbeli nosho wo miileshomwa ya kankamena kOmbiimbeli wu mone omakotampango ngoka to vulu okutula miilonga. Oto vulu wo okupopya nAakriste mboka ye na owino.

      Omukulukadhi ta dhiladhila.

      3. Dhiladhila wo kunkene etokolo lyoye tali ka guma eiyuvo lyoye nosho wo omaiyuvo gayalwe.

  • Omolwashike okuzala kwetu nokwiiyopaleka kwa simana?
    Kala nonkalamwenyo ombwanawa sigo aluhe — Oonkundathana dhopaMbiimbeli

    • Atuheni ohatu hogolola kutya otwa hala okuzala shike nonkene twa hala okwiiyopaleka. Ngele otwi iyopaleke tatu wilikwa komakotampango gOmbiimbeli, itatu ka ulika owala kutya ohatu zala shoka tu hole, ihe otatu ka nyanyudha wo Jehova. Natu ka kundathane gamwe gomomakotampango ngoka.

      1. Omakotampango geni ge na oku tu wilika, sho tatu hogolola shoka tatu zala nonkene tu na okwiiyopaleka?

      Otu na okukala hatu zala “oonguwo dhi shi kutalwa nodha yogoka” nokukala wo tatu monika nawa, shoka tashi ulike kutya otu li “aatilikalunga.” (NW) (1 Timoteus 2:9, 10) Tala omakotampango ngaka gane: (1) Omizalo dhetu odhi na okukala “dhi shi kutalwa.” Ngaashi ho shi mono kokugongala, aapiya yaJehova ohaya zala momikalo dha yoolokathana. Ihe omizalo dhetu nokwiininga nawa momitse ohaku simanekitha Kalunga. (2) Okuzala omizalo dha “yogoka” otashi ti kutya eholokopo lyetu kali na okukala tali pendutha omahalo gopamilalo muyalwe nenge li ya ningithe ya kale taya gandja eitulomo olindji kutse. (3) Ohatu ulike kutya ohatu zala “pandunge” (NW), mokuyanda okuzala omizalo dhomoode kehe tayi kondo. (4) Eholokopo lyetu oli na okukala aluhe tali ulike kutya otu li “aatilikalunga,” shoka tashi ka ulukila yalwe kutya ohatu longele Kalunga kashili. — 1 Aakorinto 10:31.

      2. Omolwashike tu na okudhiladhila kombinga yooitaali ooyakwetu uuna tatu hogolola shoka tatu zala?

      Nonando otu na emanguluko lyokuhogolola kutya otwa hala okuzala shike, otu na okudhiladhila kunkene eholokopo lyetu tali ka guma yalwe. Otu na okuninga oonkambadhala, opo kaatu pundukithe yalwe, ihe tu ‘opalele yakwetu omolwuuwanawa wawo noku ya kokitha meitaalo.’ — Lesha Aaroma 15:1, 2.

      3. Ongiini eholokopo lyetu tali vulu okuhilila yalwe kelongelokalunga lyashili?

      Ohatu kambadhala aluhe okuzala nawa, unene tuu ngele tatu yi kokugongala nenge tatu ka uvitha. Inatu hala aantu ya kale ya dhina onkundana ombwanawa ndjoka tatu ya uvithile. Pehala lyaashono, otwa hala eholokopo lyetu li ya ningithe ya kale ya hala okwiilonga oshindji kombinga yaKalunga noli “simanekithe elongo ndyoka tali popi Kalunga, Omuhupithi gwetu.” — Titus 2:10.

      ILONGA OSHINDJI

      Tala nkene tatu vulu okushilipaleka ngele omizalo dhetu neholokopo lyetu ohali ulike kutya tse Aakriste.

      Aalumentu yaali ya thikama komeho gomupanguli. Omulumentu gumwe a zala oshuta, omanga gumwe a zala oonguwo dhakwalukehe dha tuuka nokakepi.

      Okuzala nokwiiyopaleka kwetu otaku vulu okuulika kutya otwa simaneka mboka ye na oonkondopangelo. Nonando Jehova oha mono shoka shi li momitima dhetu, okuzala nokwiiyopaleka kwetu oku na wo okukala taku ulike kutya otwe mu simaneka

      4. Eholokopo ewanawa ohali ulike kutya otwa simaneka Jehova

      Omolwashike sha simana noonkondo okukala hatu hogolola nawa shoka tatu zala? Lesha Episalomi 47:2, e to yamukula omapulo taga landula:

      • Okukala tu shi kutya otu li aakalelipo yaJehova, oku na oku tu inyengitha tu kale hatu zala ngiini?

      • Mbela osha pumbiwa ngaa lela tu kale hatu zala nawa, uuna tatu yi kokugongala nongele tatu ka uvitha? Omolwashike to tile ngawo?

      5. Oshike tashi vulu oku tu kwathela uuna tatu hogolola shoka twa hala okuzala nonkene tu na okwiiyopaleka?

      Dhana OKAVIDIO.

      OKAVIDIO: “Longeni ayihe nokusimanekitha Kalunga” (10:18)

      Kutya nduno oonguwo dhetu odhondilo nenge odhombiliha, odhi na okukala aluhe dha yela notadhi opalele. Lesha 1 Aakorinto 10:24 nosho wo 1 Timoteus 2:9, 10. Opo nduno kundathaneni kutya omolwashike tu na okuyanda okuzala omizalo ndhoka . . .

      • inaadhi yogoka nenge kaadhi shi okutalwa.

      • dha ponda, tadhi imonikila nenge tadhi pendutha omahalo gopamilalo muyalwe.

      Nonando Aakriste kaye li kohi yOmpango yaMoses, ompango ndjono otayi tu longo oshindji kombinga yankene Jehova ha dhiladhila. Lesha Deuteronomium 22:5, e tamu kundathana epulo tali landula:

      • Omolwashike tu na okuyanda okuzala nokwiiyopaleka momukalo ngoka tagu monikitha omulumentu a kale a fa omukiintu nenge omukiintu a kale a fa omulumentu?

      Lesha 1 Aakorinto 10:32, 33 nosho wo 1 Johannes 2:15, 16, e tamu kundathana omapulo taga landula:

      • Omolwashike tu na okushilipaleka kutya eholokopo lyetu itali pundukitha yalwe megongalo nenge momudhingoloko?

      • Momudhingoloko gweni aantu oye hole unene okuzala nokwiiyopaleka momukalo guni?

      • Mbela sho to dhiladhila, okuzala nokwiiyopaleka kwawo otaku opalele ngaa Aakriste? Omolwashike to tile ngawo?

      Otatu vulu okuzala nokwiiyopaleka momikalo dhi ili nodhi ili, ihe nadhi kale tadhi simanekitha Jehova

      Aalumentu naakiintu yomimvo dha yoolokathana, ya za momihoko dha yoolokathana noyuukwashigwana wa yoolokathana, ya zala omizalo dhi ili nodhi ili noyi ikamula momihingo dhi ili nodhi ili nayamwe ya zala omizalo dhakwalukehe tadhi opalele Aakriste.

      AANTU YAMWE OHAYA TI: “Ondi na uuthemba wokuzala kehe shoka nda hala.”

      • Mbela oto tsu kumwe nayo? Omolwashike to tile ngawo?

      OWI ILONGO SHIKE?

      Ngele ohatu hogolola nawa omizalo ndhoka hatu zala, otatu ka ulika kutya otwa simaneka Jehova.

      Omapulo geendululo

      • Omolwashike okuzala nokwiiyopaleka kwetu kwa simana kuJehova?

      • Omakotampango gamwe geni ge na oku tu wilika sho tatu hogolola omizalo dhetu nokwiiyopaleka?

      • Ongiini eholokopo lyetu tali vulu okuguma etaloko lyayalwe li na ko nasha nelongelokalunga lyashili?

      Itulila po elalakano

      UUYELELE WA GWEDHWA PO

      Tala kutya yalwe otashi vulika ya dhiladhile ngiini kombinga yoye, uuna ya tala nkene wa zala.

      “Mbela otandi monika ngiini?” (Oshitopolwa shi li kepandja lyetu lyokointaneta)

      Tala kutya omolwashike shi li pandunge okudhiladhila tango manga inoo inyola nenge inoo ithaneka kolutu.

      “Mbela Ombiimbeli otayi ti ngiini kombinga yokwiinyola kolutu?” (Oshitopolwa shi li kepandja lyetu lyokointaneta)

      Tala omakotampango ga gwedhwa po ngoka taga vulu oku tu wilika ngele tatu ningi omatokolo.

      “Mbela omukalo gwoye gwokuzala ohagu simanekitha ngaa Kalunga?” (Oshungolangelo, Septemba 2016)

      Omukulukadhi gumwe ngoka a li a hala okukala a hokiwa kuKalunga, okwi ilongo ngiini okutaamba ko omukalo moka yalwe haya zala?

      “Okuzala nokwiiyopaleka kwayalwe okwa li haku pundukitha ndje” (Penduka mo! 22 Desemba 2003)