Ongiini aanegumbo taya vulu okukala ye na ombili? — Oshitopolwa 1

Esiku lyohango aaihokani ohaya kala ye uvite ombili noya nyanyukwa. Ohaya kala taya dhiladhila kutya ombili ndjono opo tayi kala sigo aluhe. Odhoshili kutya ombili ndjono otayi vulu okukalelela. Aaihokani Aakriste mboka ya kala mondjokana ethimbo ele, noya kala taya ningi ngaashi taya vulu ya tule miilonga omayele ngoka ge li mOmbiimbeli, oya mona kutya ombili ndjoka otayi vulu okukalelela.

1. Ombiimbeli otayi gandja omayele geni kaasamane?

Jehova okwa tula po omusamane a kale omutse gwegumbo. (Lesha Aaefeso 5:23.) Onkee ano, okwa tegelela oye a kale ta ningi omatokolo ngoka taga etele aanegumbo lye uuwanawa. Ombiimbeli otayi lombwele aasamane tayi ti: “Holeni aakiintu yeni.” (Aaefeso 5:25) Mbela shono osha hala okutya shike? Osha hala okutya, omusamane ngoka e hole omukadhi, oha ungaunga naye nolukeno kutya nduno oye li megumbo nenge opokati kaantu. Ohe mu gamene kiinima mbyoka tayi vulu oku mu etela oshiponga nohe mu sile oshimpwiyu palutu nopamaiyuvo. (1 Timoteus 5:8) Naashoka sha simanenena, ohe mu kwathele a kale e na ekwatathano ewanawa naJehova. (Mateus 4:4) Pashiholelwa, ota vulu okugalikana nokulesha Ombiimbeli pamwe nomukadhi. Ngele omusamane oha sile nawa oshimpwiyu omukadhi, kungawo ekwatathano lye naJehova otali kala lya kola. — Lesha 1 Petrus 3:7.

2. Ombiimbeli otayi gandja omayele geni kaakulukadhi?

Ombiimbeli otayi ti kutya omukulukadhi oku na ‘okusimaneka omulumentu gwe.’ (Aaefeso 5:33) Ongiini ta vulu oku shi ninga? Ota vulu okukala ha dhiladhila komaukwatya omawanawa gomusamane gwe nokoonkambadhala ndhoka ha ningi, opo e mu sile oshimpwiyu nosho wo aanona yawo. Ota vulu wo okuulika kutya okwa simaneka omusamane gwe, mokuyambidhidha omatokolo ngoka ha ningi, mokukala ha popi naye nesimaneko nohe mu popile muuwanawa, nokuli nando iha longele Jehova.

3. Ongiini aaihokani taya vulu okukaleka ondjokana yawo ya kola?

Ombiimbeli otayi popi kombinga yaaihokani, tayi ti: ‘Ayehe yaali otaya ningi omuntu gumwe.’ (Mateus 19:5) Shoka osha hala kutya, oye na okukondjitha oshinima kehe shono tashi vulu okunkundipaleka ekwatathano lyawo. Ongiini taya vulu oku shi ninga? Omokukala haya kala pamwe nohaya lombwelathana omadhiladhilo gawo nomaiyuvo gawo ya mangulukilathana, taye shi ningi pahole. Kaye na nando okweetha sha shilwe nenge gumwe, kakele kaJehova, a kale a simana e vule kuume kopandjokana. Oye na okukala ya kotokela okukala nekwatathano lyopothingo, unene tuu nomuntu ngoka kee shi kuume kawo kopandjokana.

ILONGA OSHINDJI

4. Aasamane, kaleni mu hole aakulukadhi yeni nohamu ya sile oshimpwiyu

OKAVIDIO: Aasamane, kaleni mu hole aakulukadhi yeni ngaashi mu ihole ne yene (9:53)

• Omomikalo dhimwe dhini omusamane ta vulu okuulika kutya oku hole omukadhi noku na ko nasha naye?

Lesha Aakolossa 3:12, e tamu kundathana epulo tali landula:

• Ongiini omusamane ta vulu okuulika omaukwatya ngoka mondjokana?

5. Aakulukadhi, kaleni mu hole nomwa simaneka aasamane yeni

Ombiimbeli otayi ladhipike omukulukadhi a kale a simaneka omusamane gwe, kutya nduno oha longele Jehova nenge hasho. Lesha 1 Petrus 3:1, 2, e tamu kundathana omapulo taga landula:

• Ngele omusamane gwoye iha longele Jehova, kapu na omalimbililo kutya owa hala naye a kale te mu longele. Ongiini to vulu oku mu kwathela? Mbela owu na okukala to mu uvithile ethimbo kehe nenge owa pumbwa okukala ho mu ihumbatele nawa nowe mu simaneka? Omolwashike to tile ngawo?

Omusamane nomukulukadhi otaya vulu okuninga omatokolo omawanawa. Ihe omathimbo gamwe, omukulukadhi otashi vulika kaa tse kumwe nomusamane gwe. Omukulukadhi ota vulu okupopya omadhiladhilo ge a ngungumana nonesimaneko, ihe oku na okudhimbulukwa kutya Jehova oye a pa omusamane oshinakugwanithwa shokuninga omatokolo ngoka taga etele aanegumbo lye uuwanawa. Onkee ano, omukulukadhi oku na okuninga ngaashi ta vulu a ambidhidhe etokolo lyomusamane gwe. Ngele okwa ningi ngawo, otashi ka etela aanegumbo ayehe ombili. Lesha 1 Petrus 3:3-5, e tamu kundathana epulo tali landula:

• Jehova oha kala e uvite ngiini ngele omukulukadhi okwa simaneka omusamane gwe?

6. Nkene mu na okuungaunga nomaupyakadhi mondjokana yeni

OKAVIDIO: Nkene aaihokani taya vulu okukoleka ondjokana yawo (5:44)

• Ngaashi shu ulikwa mokavidio, oshike tashi ulike kutya omusamane nomukulukadhi kaya li we ye na ekwatathano lyopothingo?

• Oshike ya ningi po, opo ya koleke ondjokana yawo?

Lesha 1 Aakorinto 10:24 nosho wo Aakolossa 3:13. Ngele mwa lesha enyolo kehe, kundathaneni epulo tali landula:

• Ongiini okutula miilonga omayele ngoka taku vulu okukoleka ondjokana?

Ombiimbeli otayi ti kutya otu na okusimanekathana. Okusimaneka gumwe okwa kwatela mo okuungaunga naye nombili. Lesha Aaroma 12:10, e tamu kundathana omapulo taga landula:

• Mbela omusamane nenge omukulukadhi oku na okukala a tega kuume ke kopandjokana oye a kale e mu simaneka tango? Omolwashike to tile ngawo?

OWI ILONGO SHIKE?

Omusamane nomukulukadhi otaya vulu okukala ya nyanyukwa ngele oye holathane, oya simanekathana nohaya tula miilonga omakotampango gOmbiimbeli.

Omapulo geendululo

• Omusamane oku na okuninga shike, opo ya kale ye na ombili mondjokana yawo?

• Omukulukadhi oku na okuninga shike, opo ya kale ye na ombili mondjokana yawo?

• Ngele owu li mondjokana, ekotampango lyOmbiimbeli lini tali vulu okukoleka ondjokana yeni?

UUYELELE WA GWEDHWA PO

Tala omaetopo omawanawa ngoka taga vulu oku mu kwathela mu kale mu na ombili megumbo.

Egumbo otali vulu okukala ehala lyombili (okambo)

Pulakena kokaimbilo hoka taka popi kombinga yomalaleko nuuyamba ngoka tamu vulu okumona mondjokana yeni, ngele ohamu tula miilonga omayele gOmbiimbeli.

Ondi ku hole shili (4:26)

Tala kutya okusimaneka omusamane gwoye e li omutse gwegumbo osha kwatela mo shike.

“Aakiintu, omolwashike mu na okuvulika kuukwamutse waalumentu yeni?” (Oshungolangelo, 1 Mei 2010)

Ongiini aaihokani yamwe ya kandula po uupyakadhi wa kwata miiti, mwa kwatelwa eteyondjokana lyawo?

Otwa koleke ondjokana yetu kekwatho lyaKalunga (5:14)