Uunongo waKalunga owi iwetikile meshito

‘Okwe tu ndungike oondunge odhindji, dhi vule ndhoka dhiiyamakuti, nokwe tu nongeke uunongo, u vule mbuka woondhila dhokegulu.’—JOB 35:11, OB-1954.

UUDHILA owu na omaukwatya omakumithi. Aantu mboka haya longo oondhila ohaya kala ya kumwa sho uudhila hawu tuka nuupu mewangandjo. Omaludhi gamwe guudhila ohaga yogo kombanda yefuta uule wokilometa omayovi nokuthika naanaa hoka tawu yi, nonando momeya kamu na sha shoka hashi vulu oku wu pukulula.

Uukwatya wa dhenga mbanda wuudhila mboka tawu holola uunongo wOmushiti gwawo, owo okwiilombwela okupitila momawi ngoka hawu lili. Tala kiiholelwa yimwe.

Nkene uudhila hawu ilombwele

Omaludhi gamwe guudhila ohaga tameke okwiilombwela manga nokuli inaaga tendulwa. Pashiholelwa, oshimote ohashi vala omayi ge li gahetatu, ngoka kehe limwe hali valwa esiku lyalyo li ili. Ngele omayi ngoka oga kolele oshita, ohaga ka tendulwa konima yuule womasiku gahetatu. Okuza mpono yina oha kala noshinakugwanithwa oshidhigu shokutonatela uudhilona we mboka wa tendulwa omanga natango a langela eyi limwe ndyoka inaali tendulwa. Ethimbo limwe uudhilona auhe wu li uhetatu woshimote ohawu tendulwa muule woowili dhi li hamano. Ongiini mbela shika tashi vulika? Etompelo limwe ndyoka lya gandjwa kaakonakoni olyo kutya uudhilona woshimote ohawu lombwelathana manga wu li momayi nohawu ningi ompangela opo wu tendulwe lwopethimbo lya faathana.

Ngele uudhila wa koko, uulumentu owo unene hawu lili. Ohawu lili unene pethimbo lyokulonda opo wu ninge omandhindhiliko pomahala gawo nenge wu fuule uudhila uukiintu. Molwaashoka oludhi kehe lwuudhila olu na omukalo nkene halu ilombwele, shika ohashi kwathele uudhila uukiintu wu dhimbulule omawi guudhila uulumentu woludhi lwawo.

Uudhila ohawu lili unene koongulasha nongele etango tali ningine nohawu shi ningi netompelo ewanawa. Ethimbo ndyoka ombepo ohayi kala ya mwena noihaku kala unene ekudhilo ndyoka tali ningitha omawi gawo gaa uvike. Aakonakoni oye shi mona mo kutya okulila kuudhila ohaku uvika nawa lwiikando 20 koongulasha nokongulohi shi vulithe ethimbo lyomutenya.

Nonando uudhila uulumentu owo unene hawu lili, auhe uulumentu nuukiintu ohawu lili omawi gi ili, gamwe omafupi ngoka ge na omaityo ga yoolokathana. Naangongwa oha lili omawi omugoyi ga yoolokathana. Oku na po ewi lyokulondodha ngele opu na oshiponga tashi zi pombanda ngaashi oondhila ndhoka hadhi li onyama, ihe oku na po natango ewi lyokulondodha kombinga yoshiponga shoka tashi ya okuza pevi.

Omagano ga dhenga mbanda

Uudhila ohawu valwa wu na uunongo uukumithi. Ihe uuna tashi ya puunongo wokupopya, mboka waantu uukumithi unene. Job 35:11 ota ti kutya Kalunga okwa shita aantu ye na ‘oondunge dhi vule dhoondhila dhokegulu.’ Shoka shi ikalekelwa kaantu osho uunongo wokutongola omadhiladhilo ga kitakana okupitila momawi ngoka haga zi moothipawi nenge mokuudhika.

Aanona ohaya valwa nuunongo wokwiilonga omalaka ogendji shi vulithe iishitwa ayihe. Oshifo American Scientist otashi ti: “Aanona aashona ohaya vulu okwiilonga elaka nonando aavali yawo ihaya popi nayo shu ukilila, aanona yoombolo ohaya vulu okutota po elaka lyokuudhika kuyo yene ngele ihaya longwa okuudhika megumbo.”

Oho kala wu uvite ngiini?

Oho kala wu uvite ngiini ngele to pulakene kewi ewanawa lyokadhila nenge lyokanona hoka opo taki ilongo okupopya? Mbela owu wete uunongo waKalunga miinima mbyoka a shita?

Konima sho omupisalomi David a li a tedhatedha nkene a shitwa kuKalunga osha li she mu inyengitha a tye: “Otandi ku hambelele e tandi ku simaneke, oshoka onda shitwa nuunkulungu. Iilonga yoye iikumithi; shika ondi shi shi nawa.” (Episalomi 139:14) Sho tu ulike olupandu lwoye mokukonakona uunongo waKalunga mboka wi iwetikile meshito, eitaalo lyoye moonkondo dhe dhoku ku pa omayele ge li mondjila otadhi ka koka.

Oonyothi otadhi holola oonkondo dhaKalunga

“Tala owala utale kegulu! Olye a shiti oonyothi ndhoka wa tala? Oye ngoka te dhi enditha dha fa etangakwiita. Adhihe okwe dhi tseya nawa, nokehe yimwe ote yi tumbula kedhina lyayo! Oonkondo dhe oonenenene, odha kolelela nokape na ndjoka e yi hunutha po.”—JESAJA 40:26.

ETANGO oli li owala onyothi yuunene wopokati. Nonando ongaaka, enene lwiikando 330 000 li vulithe unene wevi. Odhindji dhomoonyothi ndhoka dhi li popepi nevi odhi vulike ketango. Ihe oonyothi dhilwe odhi vule etango muunene lwiikando 27 lwaampono.

Etango ohali gandja oonkondo dhi thike peni? Dhiladhila owala andola wa thikama uule wookilometa 15 kokule neziko lyomulilo, ihe owu uvite natango uupyu womulilo ngoka. Etango oli li kokule nevi uule wookilometa omamiliyona 150. Ihe nonando ongaaka, uupyu walyo otawu vulu oku tu fika. Shoka tashi kumitha osho kutya oonkondo dhetango ndhoka hadhi thiki kevi odhi li owala okapambu okashona noonkondo. Nonando ongaaka, okapambu hoka okashona koonkondo dhetango oka gwana okukaleka po onkalamwenyo kombanda yevi.

Aanongononi oya yalulila kumwe oonkondo ndhoka hadhi zi ketango kutya odha gwana okukaleka po oopulanete dhi thike pevi dhi li omabiliyona 31. Natango okuyalula owala oonkondo ndhoka momukalo gulwe ishewe, Ehangano Space Weather Prediction Center (SWPC) olya popi moInternet kutya andola osha li tashi vulika oonkondo dhetango dhi gongelwe owala muule wosekonde yimwe, otali vulu okugandja kuAmerika “oonkondo dholusheno dha gwana dhi thike pwaandhoka haya longitha ngashingeyi uule woomvula 9 000 000 tadhi ya.”

Oonkondo dhetango ohadhi zi mondingandinga yalyo, moka ooatoma hadhi tatagulwa nokugandja oonkondo dhopalute. Etango enene noonkondo nolya thita unene shoka hashi ningitha opo oonkondo ndhoka tali gandja okuza mondingandinga yalyo dhi kuthe oomvula omamiliyona opo dhi thike kombanda yalyo. Ehangano SWPC olya popi moInternet tali ti: “Ngele etango olya kala itaali gandja we oonkondo okuza nena, iilanduliko yaashoka otatu ke yi mona owala konima yoomvula 50 000 000 kombanda yevi.”

Ngashingeyi dhiladhila koshinima shika: Uuna to tala kegulu uusiku oho mono oonyothi omayovi nomukehe yimwe yomudho ohamu zi oonkondo odhindji dha fa ndhoka dhetango. Aanongononi oya yalula oonyothi omamiliyona omayovi ogendjigendji ndhoka dhi li mewangandjo.

Oonyothi adhihe ndhoka odha za peni? Aakonakoni oyendji nonando kaye uvite ko kutya omolwashike, oyi itaala kutya ewangandjo olye ya po oomvula omamiliyona omayovi 14 lwaampono dha pita. Ombiimbeli otayi yelitha tayi ti: “Petameko Kalunga okwa shiti egulu nevi.” (Genesis 1:1) Nopwaahe na omalimbililo, Ngoka a shita oonyothi ndhoka hadhi gandja oonkondo oonenenene ota vulu okwiithanwa e li ‘omunankondo omunenenene.’—Jesaja 40:26.