Kotoba

Mbela omathimbo gamwe oho mono oshidhigu okuvulika? Omukwaniilwa David osho a li u uvite ngawo. Onkee okwa li a galikana kuKalunga a ti: “Ninge ndje omuvuliki.” (Eps. 51:12) David okwa li e hole Jehova. Ihe nando ongawo, ngaashi tse, omathimbo gamwe David okwa li ha mono oshidhigu okuvulika. Omolwashike mbela? Shotango, omolwaashoka otwa thigulula iikala yokwaavulika. Oshitiyali, Satana oha kambadhala aluhe oku tu nwetha mo tu tukululile Jehova oshipotha, ngaashi ye. (2 Kor. 11:3) Oshititatu, otu li muuyuni mbuka wa udha iikala yuunashipotha, ano “ombepo ndjoka tayi pangele ngashingeyi aantu mboka ihaa vulika kuKalunga.” (Ef. 2:2) Onkee ano otu na okulonga nuudhiginini tu kondjithe okwaagwanenena kwetu, Ondiyapoli nuuyuni mbuka, opo tu kale hatu vulika kuJehova nokwaamboka a pa oonkondopangelo. w23.10 6 ¶1

Oshike tatu vulu okwiilonga moshikumithalonga shaJesus shokushitukitha omeya omaviinu? Otatu ilongo mo oshiilongomwa kombinga yeifupipiko. Jesus ka li i itanga kombinga yoshikumithalonga shoka, nokuli ini itanga nando kombinga yoshinima kehe shoka a ninga. Pehala lyaashono, okwa gandja neifupipiko esimano alihe kuHe. (Joh. 5:19, 30; 8:28) Ngele otwa holele Jesus mokukala twa itala ko pandjele, itatu ki itanga kombinga yaashoka twa longa. Inatu itangela shoka twa ninga, ihe natu tange Kalunga ketu a dhenga mbanda, ngoka tu na uuthembahenda woku mu longela. (Jer. 9:23, 24) Natu mu pe esimano ndyoka oye a gwana oku li pewa. Itatu vulu okupondola mokulonga oshilonga kehe oshiwanawa, inaatu kwathelwa kuJehova. (1 Kor. 1:26-31) Ngele tse aaifupipiki, itatu ki itangela iinima iiwanawa mbyoka twa ningila yalwe. Otatu ka kala tu uvitile ombili okutseya kutya Jehova oku wete nokwa lenga shoka tatu ningi. (Yelekanitha Mateus 6:2-4; Heb. 13:16) Odhoshili kutya ohatu nyanyudha Jehova, uuna tatu holele eifupipiko lyaJesus. — 1 Pet. 5:6. w23.04 4 ¶9; 5 ¶11-12

Omuyapostoli Paulus okwa li a nwethwa mo kuKalunga a ladhipike Aakriste ya lalakanene uuwanawa wayalwe. Ongiini nduno tatu vulu okutula omayele ngoka miilonga pokugongala? Omokudhimbulukwa kutya yalwe nayo oya hala okukutha ombinga muko ngaashi tse. Dhiladhila kwaashika. Uuna to popi nookuume koye, mbela oto ka kala owala to popi unene e taya kala owala ye na okampito okashona kokupopya sha? Aawe, hasho to ka ninga. Owa hala nayo ya kuthe ombinga moonkundathana. Sha faathana, pokugongala otwa hala tu pe aantu oyendji ompito ngaashi tashi vulika ya gandje omatyokosha. Nokuli omukalo gumwe gwa dhenga mbanda gwokutsa omukumo aamwatate naamwameme, omoku ya pa ompito ya popye kombinga yeitaalo lyawo. (1 Kor. 10:24) Onkee ano ngele ohatu gandja omatyokosha omafupi, kungawo otatu ka pa yalwe ompito nayo ya kuthe ombinga. Nonando oto gandja etyokosha efupi, yanda okupopya kombinga yiitsa oyindji unene. Ngele owa popi ashihe shoka shi li mokatendo, yalwe itaya ka kala naanaa ye na oshindji okutya. w23.04 22-23 ¶11-13

Otu na okudhimbulukwa kutya osha simana okutsikila okukwathela yalwe, unene tuu okukala tatu uvithile aantu. Otwa pumbwa okukala hatu tifuka uuna tu li muukalele. Ohatu tsakaneke aantu ye na omaitaalo niikala ya yoolokathana, mboka ya za momaputuko gi ili no gi ili. Omuyapostoli Paulus okwa li ha tifuka, notatu vulu okwiilonga ko sha koshiholelwa she. Jesus okwa li a langeke po Paulus e li “omutumwa mokati kaapagani.” (Rom. 11:13) Onkee ano, Paulus okwa li a uvithile Aajuda, Aagreka, aantu mboka ya longwa, aanamukunda, aakwanepangelo naakwaniilwa. Opo a adhe omitima dhaantu ayehe mboka ya yoolokathana, Paulus okwa li a ‘ningi ashihe shoka ta vulu omolwaayehe.’ (1 Kor. 9:19-22) Okwa li ha gandja eitulomo komihoko, komaputuko nokwaashoka aapulakeni ye yi itaala, opo nduno ta popi nayo momukalo ngoka tagu ya ningitha ya kale ye na ohokwe muKalunga. Natse otatu vulu okuhwepopala mokuuvitha ngele otwa kala hatu tifuka, e tatu kambadhala okudhiladhila kutya omomukalo guni dhingi tatu vulu okukwathela omuntu kehe. w23.07 23 ¶11-12

Uuna omuntu e na omwenyo omwaanawa itashi ti kutya ekatalume, ihe omulaadhi. Ohashi pula uulaadhi opo omuntu wu vule okukala wa ngungumana, uuna wa taalela onkalo ondhigu. Omwenyo omwaanawa, nenge engungumano olyo uukwatya wumwe ‘womiiyimati yombepo.’ (Gal. 5:22, 23) Oshitya “engungumano” mOshigreka osha li hashi longithwa sha ukithwa kokakambe okapwidhi ka dheulwa. Kala ando wa fa wu ka wete ka ngungumana. Nando okakambe hoka ngashingeyi ohaka kala ka ngungumana, oke na natango oonkondo. Tu li aantu, ongiini tatu vulu okukokeka uukwatya womwenyo omwaanawa, ihe natango otu li aalaadhi? Shoka itatu vulu oku shi ninga koonkondo dhetu yene. Otu na okupula ombepo ondjapuki yaKalunga megalikano yi tu kwathele tu kokeke uukwatya mbuka uuwanawa. Opu na aantu oyendji ya ilonga okukala aayifupipiki. Oonzapo odhindji ohadhi kala dhi ifupipika, uuna tadhi patanekwa, naashoka ohashi kwathele yalwe ya kale ye na etaloko ewanawa li na ko nasha nadho. — 2 Tim. 2:24, 25. w23.09 15 ¶3

Omuyapostoli Johannes okwa li a mono aakuluntu 24 taya galikana Jehova megulu, memoniko ekumithi. Oya li ya tanga Jehova taya ti okwa gwana “okusimanekwa omolweadhimo, esimano noonkondo.” (Eh. 4:10, 11) Aayengeli aadhiginini nayo oye na omatompelo ogendji gokutanga nokusimaneka Jehova. Oye li naye megulu noye mu shi nawa. Ohaya mono nkene ta ulike omaukwatya ge miilonga ye. Uuna ya mono nkene Jehova ta katuka oonkatu, ohashi ya inyengitha ye mu tange. (Job 38:4-7) Natse otu na okutanga Jehova momagalikano getu. Otatu vulu oku shi ninga moku mu lombwela shoka tu hole kombinga ye nosho wo kutya omolwashike twe mu simaneka. Sho to lesha nokukonakona Ombiimbeli, kambadhala okumona omaukwatya gaJehova ngoka wu hole unene. (Job 37:23; Rom. 11:33) Opo nduno lombwela Jehova nkene wu uvite kombinga yomaukwatya ngoka. Otatu vulu wo okutanga Jehova sho e tu kwathela nosho wo nkene a kwathela aamwatate naamwameme ayehe. — 1 Sam. 2:1, 2. w23.05 3-4 ¶6-7

Mo 1919, Babilon Oshinene okwa li a nyengwa okupangela oshigwana shaKalunga. Momumvo ngoka ‘omupiya omudhiginini nomunandunge’ okwa langekwa po nokwa tameke okulonga, opo aanamitima omiwanawa ya vule okutameka okweenda ‘mOndjila ondjapuki.’ (Mat. 24:45-47; Jes. 35:8) Iilonga mbyoka yalwe ya li ya longo monakuziwa ya longekidhe ondjila ndjoka, oya li ya kwathele aantu mboka taya tameke okweenda monenendjila ya ilonge kombinga yaJehova nomalalakano ge. (Omayel. 4:18) Oya li wo taya vulu okukala metsokumwe niitegelelwa yaJehova. Jehova ka li a tegelela oshigwana she shi ninge omalunduluko palumwe. Pehala lyaashono, okwa endele ko te shi yogola kashona nakashona. Itatu ka kala tuu twa nyanyukwa, sho tatu ka vula okunyanyudha Jehova mukehe shimwe tatu ningi! Ondjila kehe ohayi kala ya pumbwa okwoopalekululwa. Okuza mo 1919 iilonga yokwoopaleka “Ondjila ondjapuki” oya tsikile nokulongwa, opo aantu oyendji ya vule okuza mo muBabilon Oshinene. w23.05 17 ¶15; 19 ¶16

Olutuwiliki olwa kala talu dheula aakwatheli yookomitiye dhi ili nodhi ili dhOlutuwiliki. Aakwatheli mbaka ngashingeyi otaya longo nuudhiginini iilonga oyindji mehangano. Oya dheulwa nawa ya tsikile niilonga yokusila oshimpwiyu oonzi dhaKristus. Uuna oshihupe shaagwayekwa sha yi megulu, sho uudhigu uunene wu li pokuhula, aapiya yaJehova mboka ye li kombanda yevi, otaya ka tsikila oku mu longela nuudhiginini. Molwaashoka Jesus Kristus oye ta wilike, oshigwana shaJehova, kashi na siku shi ethe po oku mu longela nuudhiginini. Otu shi kutya pethimbo ndyoka, Gog yaMagog, ano iigwana yi imanga kumwe, ota ka ponokela oshigwana shaKalunga. (Hes. 38:18-20) Ihe eponokelo ndyono lyopakathimbo itali ka imba oshigwana shaKalunga shi tsikile oku mu longela. Jehova ote ke shi gamena shili. Omuyapostoli Johannes okwa li a mono memoniko “engathithi,” nenge ongundu onene yoonzi dhilwe dhaKristus. Johannes okwa li a lombwelwa kutya “engathithi” ndyoka olya pita ‘momahepeko omanene.’ (Eh. 7:9, 14) Kapu na omalimbililo kutya Jehova ote ke ya gamena. w24.02 5-6 ¶13-14

Oshike tu na okuninga, opo tu pewe ombepo ondjapuki? Otwa pumbwa oku yi indila okupitila megalikano, okukonakona Oohapu dhaKalunga dha nwethwa mo, nokweendathana nehangano lye, ndyoka ta wilike nombepo ye ondjapuki. Okuninga ngawo otaku tu kwathele tu kokeke “iiyimati yOmbepo.” (Gal. 5:22, 23) Kalunga oha gandja owala ombepo ye ondjapuki kumboka ye na omadhiladhilo neihumbato lya yogoka. Ita ka tsikila oku tu pa ombepo ye ondjapuki, ngele otu na omadhiladhilo ga nyata nohatu ningi iinima mbyoka hatu dhiladhila kuyo. (1 Tes. 4:7, 8) Opo tu tsikile okupewa ombepo ondjapuki, ‘katu na okudhina omahunganeko.’ (1 Tes. 5:20) Movelise ndjika, “omahunganeko” otaga ulike komatumwalaka ngoka Jehova he tu pe okupitila mombepo ye ondjapuki, mwa kwatelwa ngoka ge na ko nasha nesiku lye nosho wo kutya ethimbo ndyoka tu li mulyo olya endelela. Inatu dhiladhila nando kutya esiku lyaJehova, nenge Armagedon ite ya pethimbo lyetu. Pehala lyaashono, natu li kaleke aluhe momadhiladhilo, nokukala twa ipyakidhila niilonga mbyoka tayi ulike kutya otwa ‘igandjela’ Kalunga. — 2 Pet. 3:11, 12. w23.06 12 ¶13-14

Tu li Aakriste ngele otwa mono ethano inaali yogoka koshikwaelektronika shetu inaatu shi tegelela, otatu ka ninga po shike? Otu na okweetha nziya oku li tala. Otashi ka kala oshipu kutse oku shi ninga, ngele otwa dhimbulula kutya ekwatathano lyetu naJehova olyo lya simanenena. Nokuli nomathano gamwe ngoka kaage shi giipala otaga vulu okupendutha mutse omahalo giipala. Omolwashike tu na oku ga yanda? Omolwaashoka inatu hala nando okutameka okudhiladhila sha kombinga yiinima yopamilalo. (Mat. 5:28, 29) Omukuluntugongalo gwokuThailand gwedhina David okwa ti: “Ohandi ipula mwene te ti: ‘Nokuli nando omathano otashi vulika kaage shi giipala, mbela Jehova ote ke ga hokwa ngaa, ngele onda tsikile oku ga tala?’ Okwiitompa kwa tya ngawo okwa kwathele ndje ndi katuke pandunge.” Okukala twa tila okuninga oshinima kehe oshiwinayi otashi ke tu kwathela tu ninge omatokolo gopandunge. Uumbanda wokutila Kalunga owo “ekota” nenge ekankameno ‘lyuunongo.’ w23.06 23 ¶12-13

Pethimbo ndyoka uutumbulilo “momagumbo geni” otashi vulika wu ka ukithwe komagongalo getu. Pethimbo lyuudhigu uunene Jehova oku uvaneka kutya ote ke tu gamena, ngele otwa tsikile okukala twa hangana naamwatate naamwameme. Onkee ano, natu longe nuudhiginini ngashingeyi tu kale hatu idhidhimikile aamwatate naamwameme, nokukala wo tu ya hole. Osha simana tu ninge ngaaka, oshoka otashi vulika osho tashi ke tu etela ehupitho. “Esiku enene lyOmuwa” otali ka kala edhigu noonkondo kaantu ayehe. (Sef. 1:14, 15) Oshigwana shaJehova otashi ka hepekwa wo. Ihe ngele otwa kala twi ilongekidha ngashingeyi, otatu ka vula okukala twa ngungumana nokukwathela yalwe. Otatu ka idhidhimikila uupyakadhi kehe mboka tashi vulika wu tu adhe. Uuna ooitaali ooyakwetu taya mono iihuna, otatu ka ninga nawa ngele otwe ya kwathele moku ya ulukila olukeno noku ya pa shoka ya pumbwa. Ngele otwi ilongo okukala tu hole aamwatate naamwameme ngashingeyi, otatu ka kala tu ya hole unene monakuyiwa. Opo nduno Jehova ote ke tu pa ondjambi yomwenyo gwaaluhe muuyuni moka iiponga yopaunshitwe nuudhigu kehe itaawu ka dhimbulukiwa we. — Jes. 65:17. w23.07 7 ¶16-17

Oohapu dhaKalunga olundji ohadhi popi aalumentu aadhiginini ye li aanankondo. Ihe nokuli naamboka ya li haya kala ye na oonkondo odhindji, haaluhe haya kala ye uvite ye dhi na. Pashiholelwa, omukwaniilwa David okwa li ha kala e uvite a kola, “ngaashi ondundu,” ihe poompito dhilwe okwa li ha haluka, nenge ha kala a tila. (Eps. 30:7) Ombepo yaKalunga oya li ya pe Simson oonkondo dhopalutu, ihe nando ongawo okwa li ha kala e shi kutya ngele kadhi po, ota ka kala a ‘fa aalumentu ooyakwawo.’ (Aatok. 14:5, 6; 16:17) Jehova oye a li a nkondopaleke aalumentu mboka aadhiginini. Omuyapostoli Paulus okwa li e shi zimine kutya naye okwa pumbwa oonkondo okuza kuJehova. (2 Kor. 12:9, 10) Naye okwa li e na uupyakadhi wuukolele. (Gal. 4:13, 14) Omathimbo gamwe osha li wo oshidhigu kuye okulonga shoka sha uka. (Rom. 7:18, 19) Poompito dhimwe, okwa li ha kala e na iimpwiyu nokwa tila kutya oshike tashi ke mu ningilwa. (2 Kor. 1:8, 9) Ihe nando ongawo, uuna Paulus a li e uvite kee na oonkondo, oha kala e uvite a nkondopalekwa. Ngiini mbela? Jehova okwa li a pe Paulus oonkondo ndhoka a li a pumbwa, opo a vule okwiidhidhimikila omashongo ge. w23.10 12 ¶1-2

Omathimbo gamwe ngele ohatu kala tatu kondjo nomaiyuvo gokukala tu uvite kaatu na oshilonga, otatu vulu okudhimbulukwa kutya Jehova oye e tu nanena kuye. (Joh. 6:44) Oha mono uuwanawa mutse, mboka ihaatu vulu okumona, noku shi nawa omitima dhetu. (2 Ondjal. 6:30) Onkee otatu vulu oku mu inekela, uuna ta ti kutya otu na ongushu kuye. (1 Joh. 3:19, 20) Manga inaatu ilonga oshili, yamwe yomutse otwa li twa ningi iinima mbyoka tashi vulika hatu kala natango tu uvite tu na ondjo muyo. (1 Pet. 4:3) Nokuli nAakriste aadhiginini ohaya kondjo niikala mbyoka. Mbela nangoye omathimbo gamwe oho kala wu uvite kutya Jehova ita vulu oku ku dhimina po? Ngele osho ho kala wu uvite ngawo, okutseya kutya aapiya yaJehova aadhiginini nayo oya kondja nomaiyuvo ga tya ngawo otashi vulu oku ku hekeleka. Pashiholelwa, omuyapostoli Paulus okwa li ha kala e uvite e li omuntu omukweyi, uuna ta tedhatedha kokwaagwanenena kwe. (Rom. 7:24) Odhoshili kutya Paulus okwa li a iyele ombedhi e ta ninginithwa. Shimwe ishewe, okwa li a popi kombinga ye mwene kutya ‘oku vulike kaayapostoli ayehe’ noku li omulunde “omunene.” — 1 Kor. 15:9; 1 Tim. 1:15. w24.03 27 ¶5-6

Shimwe shoka tatu ilongo ketokolo lyOmukwaniilwa Joas ndyoka inaali dhiladhilwa nawa, osho kutya otwa pumbwa okuhogolola ookuume mboka ye hole Jehova noya hala oku mu nyanyudha, nookuume mbono otaye ke tu kwathela tu longe shoka oshiwanawa. Otatu vulu okupanga uukuume naamboka aakuluntu kutse nenge aashona kutse. Dhimbulukwa kutya Joas okwa li omushona moomvula kukuume ke, Jehoiada. Ngele tashi ya pookuume mboka to hogolola ipula to ti: ‘Mbela otaya kwathele ndje ngaa ndi koleke eitaalo lyandje muJehova? Otaya ladhipike ndje ngaa ndi kale handi vulika komithikampango dhaKalunga? Ohaya popi ngaa kombinga yaJehova nokombinga yoshili ndjoka ya ilonga mOmbiimbeli? Oya simaneka ngaa omithikampango dhaKalunga? Mbela ohaya lombwele ndje shoka tashi nywitha omakutsi, nenge ohaya pukulula ndje nopwaa na okukakadhala?’ (Omayel. 27:5, 6, 17) Uushili owo kutya, ngele ookuume koye kaye hole Jehova, nena inaye ku opalela. Ihe ngele owu na ookuume mboka ye hole Jehova, otaya ka kala aluhe taye ku kwathele. — Omayel. 13:20. w23.09 9-10 ¶6-7

Ondanda ndjoka ya tolokwa Alfa oyo ya tameka noalfabeta yOshigreka, omanga ndjoka ya tolokwa Omega oyo yahugunina moalfabeta ndjoka. Sho Jehova a ti kutya oye “Alfa naOmega,” okwe shi ningi, opo e tu kwathele tu uve ko kutya uuna a tameke oshinima, oku na oku shi manitha. Sho Jehova a shiti Adam naEva, okwa li e ya lombwele ta ti: “Valathaneni, ne mu indjipale nokuudha evi alihe. Li tuleni mepangelo lyeni.” (Gen. 1:28) Pompito ndjoka, Jehova okwa li a fa ta ti oye “Alfa,” oshoka okwa popi sha yela elalakano lye ndyono kutya ethimbo otali ke ya, sho oluvalo lwaAdam naEva oluvuliki talu ka udha evi noku li ninga oparadisa. Monakuyiwa, uuna elalakano lye lya gwanithwa, Jehova ota ka kala a fa ta ti oye ‘Omega.’ Sho Jehova a mana okushita ‘egulu nevi noongundu dhayo adhihe,’ okwa li a popi sha shoka tashi ulike kutya elalakano lye otali ka gwanithwa shili. Jehova okwa li a tsu omuthindo kutya ke na siku a ndope okugwanitha po elalakano lye li na ko nasha naantu nosho wo nevi. Shoka otashi ka gwanithwa thiluthilu pehulilo lyesiku etiheyali. — Gen. 2:1-3. w23.11 5 ¶13-14

Olweendo okuza kuBabilonia wa uka kuIsraeli olwa li oludhigu notalu vulu okupula oomwedhi ne. Ihe Jehova okwa li a uvaneke kutya uupyakadhi kehe mboka wa li tawu monika wa fa tawu ya keelele ya shune, ote ke wu kandula po. Aajuda mboka aadhiginini oya li ye shi kutya omayambeko ngoka taya ka mona ngele oya shuna kuIsraeli, oge vule omaiyambo ngoka ye na okuninga. Eyambeko enene ndyoka ya li taya ka mona, olyo okulongela Jehova. MuBabilonia kamwa li mu na otempeli yaJehova. Aaisraeli kaya li ye na mpoka taya vulu okuyamba omayambo, ngaashi ompango yaMoses ya li tayi ya pula ya ninge. Kapwa li wo pwa unganekwa aayambi mboka taya vulu okuyamba omayambo ngoka. Shimwe ishewe, moshilando moka omwa li wo mu na aantu oyendji mboka ya li haya longele iikalunga, okuyelekanitha naantu mboka ya li haya vulika komithikampango dhaJehova. Aajuda oyendji aatilikalunga oya li ya halelela okushuna kevi lyawo, hoka ya li taya ka vula ishewe okutotulula elongelokalunga lyashili. w23.05 14-15 ¶3-4

Otwa pumbwa ekwatho lyombepo ondjapuki yaKalunga, opo tu tsikile okukala “aantu yomuuyelele.” Omolwashike mbela? Omolwaashoka kashi shi oshipu okukala muuyuni mbuka wa yonana. (1 Tes. 4:3-5, 7, 8) Ombepo ondjapuki otayi vulu oku tu kwathela tu kondjithe omadhiladhilo gaantu yomuuyuni, mboka ihaaya tala ko iinima momukalo moka Jehova he yi tala ko. Otayi vulu wo oku tu kwathela tu kokeke ‘uuwanawa nuuyuuki.’ (Ef. 5:9) Omukalo gumwe moka tatu vulu okumona ombepo ondjapuki, omoku yi indila tu yi pewe. Jesus okwa ti kutya Jehova ota ka “gandja Ombepo Ondjapuki kumboka taye mu indile.” (Luk. 11:13) Uuna tatu tanga Jehova pamwe naamwatate naamwameme pokugongala kwopaKriste, ohatu pewa wo ombepo ondjapuki. (Ef. 5:19, 20) Enwethomo ewanawa lyombepo yaKalunga, otali ke tu kwathela tu kale nonkalamwenyo ndjoka tayi mu nyanyudha. w24.03 23-24 ¶13-15

Mbela owa pumbwa okukala wu na eidhidhimiko shi vulithe nale? Ngele osho, galikana wu li pewe. Eidhidhimiko oli li oshiimati shombepo. (Gal. 5:22, 23) Onkee otatu vulu okupula Jehova ombepo ondjapuki e tu kwathele tu kokeke uukwatya mboka. Ngele otwa taalela onkalo ndjoka tayi yeleke eidhidhimiko lyetu natu ‘tsikile okupula’ ombepo ondjapuki yi tu kwathele tu kale aaidhidhimiki. (Luk. 11:13) Otatu vulu wo okupula Jehova ekwatho tu kale hatu tala ko iinima ngaashi ye he yi tala ko. Konima yokugalikana otwa pumbwa okuninga ngaashi tatu vulu esiku kehe tu kale aaidhidhimiki. Ngele otwa tsikile okukala hatu galikana tu kale tu na eidhidhimiko, Jehova ote ke tu kwathela nonando katwa li tu li na nale. Okutedhatedha kiiholelwa yOmbiimbeli ohaku kwathele wo. MOmbiimbeli omu na iiholelwa oyindji yaantu mboka ya li aaidhidhimiki. Ngele otwa kala hatu tedhatedha kiiholelwa mbyoka, otatu ki ilonga nkene tatu vulu okuulika uukwatya mboka. w23.08 22 ¶10-11

Jesus okwa li a shilipaleke omuyapostoli Petrus kutya Jehova ote ke mu sila oshimpwiyu. Jesus omuyumudhwa okwa li a longele Petrus naayapostoli ooyakwawo oshikumithalonga shokuyula oohi. (Joh. 21:4-6) Osha yela kutya oshikumithalonga shoka osha li sha shilipaleke Petrus kutya Jehova ota vulu lela oku mu pa iinima mbyoka a pumbwa. Otashi vulika omuyapostoli ngoka a li a dhimbulukwa oohapu dhaJesus ndhoka tadhi ti kutya Jehova ota ka sila oshimpwiyu mboka taya ‘kongo tango Uukwaniilwa waKalunga.’ (Mat. 6:33) Iinima ayihe mbyoka oya li ya kwathele Petrus a pitithe komeho iilonga yokuuvitha monkalamwenyo ye, ihe haku kwata oohi. Okwa li a uvitha nuulaadhi mesiku lyaPentekoste 33 E.N., mokukwathela aantu omayuvi ya taambe ko onkundana ombwanawa. (Iil. 2:14, 37-41) Okwa li wo a kwathele Aasamaria naamboka kaaye shi Aajuda ya taambe ko Kristus. (Iil. 8:14-17; 10:44-48) Osha yela kutya Jehova okwa li a longitha Petrus momukalo omukumithi, a ete aantu yomaludhi agehe megongalo. w23.09 20 ¶1; 23 ¶11

Konima yomimvo mbali lwaampono, sho Aababilonia ya hanagula po Jerusalem, Omukwaniilwa Nebukadnezzar gwaBabilon okwa li a yaguma ondjodhi kombinga yoshiyelekela oshinenenene. Okwa li a lombwele aalumentu ye aanandunge, mwa kwatelwa Daniel, ye mu fatululile ondjodhi ye naashoka tayi ti, nongele oya nyengwa ote ya dhipagitha po. (Dan. 2:3-5) Daniel okwa li e na okuninga po sha nziya, ngele hasho, aantu oyendji otaya ka sa. Okwa “yi komukwaniilwa nokwe mu indile, a pewe ethimbo lya gwana, opo a vule okufatulula ondjodhi.” (Dan. 2:16) Shoka osha li sha ulike kutya Daniel oku na uulaadhi neitaalo. Ombiimbeli inayi popya kutya Daniel okwa fatululile nale oondjodhi. Daniel okwa li a pula ookuume ke “ya galikane Kalunga komegulu, e ya sile ohenda noku mu pula, e ya hololele oshiholekwa shika.” (Dan. 2:18) Jehova okwa li a yamukula omagalikano ngoka. Kekwatho lyaKalunga, Daniel okwa fatulula ondjodhi yaNebukadnezzar. Daniel nookuume ke, oya li ya hupu. w23.08 3 ¶4

Uuwanawa mboka hawu zi mokukala omwiidhidhimiki. Ngele otu li aaidhidhimiki, ohatu kala tu na ombili notwa ngungumana. Kungawo, eidhidhimiko otali vulu okuhwepopaleka uukolele wetu wopalutu nowopamadhiladhilo. Ngele ohatu idhidhimikile yalwe, ohatu kala tu na ekwatathano ewanawa nayo. Ohatu kala wo tu na uukumwe megongalo. Nuuna gumwe a ungaunga natse nayi, onkalo itayi ka nayipala, molwaashoka ihatu geye mbala. (Eps. 37:8; Omayel. 14:29) Ihe komeho gaayihe, ohatu holele Tate yetu gwomegulu nohatu hedha popepyeelela naye. Eidhidhimiko uukwatya mboka hawu tu etele uuwanawa. Nonando omathimbo gamwe otashi vulika tu kale tu wete oshidhigu okukala aaidhidhimiki, kekwatho lyaJehova, otatu vulu okutsikila okukokeka uukwatya mboka. Omanga twa tegelela uuyuni uupe, otatu vulu okukala neinekelo kutya, ‘Omuwa ota tonatele mbo haa vulika kuye, mboka haa tegelele esilohenda lye.’ (Eps. 33:18) Onkee ano atuheni natu kaleni twa tokola toko okukala aaidhidhimiki. w23.08 22 ¶7; 25 ¶16-17

Jakob okwa li a popi kutya omulumentu ngoka otashi vulika a li ta ti oku na eitaalo, ihe mbela eitaalo lye olya li ngaa li na iilonga? (Jak. 2:1-5, 9) Jakob okwa li wo a popi omuntu ngoka a mono ‘omumwatate nenge omumwameme kee na oonguwo nenge iikulya,’ ihe ine mu pa ekwatho ndyoka a li a pumbwa. Nokuli nando omuntu ngoka okwa li a ti kutya oku na eitaalo, kalya li tali endele pamwe niilonga, kungawo eitaalo lye itali kwatha sha. (Jak. 2:14-16) Jakob okwa li a popi kombinga yaRahab e li oshiholelwa oshiwanawa sheitaalo li na iilonga. (Jak. 2:25, 26) Rahab okwa li a uvu kombinga yaJehova e ta mono kutya Jehova okwa kwathela Aaisraeli. (Jos. 2:9-11) Ano okwa li a ulike eitaalo li na iilonga, sho a gamene oondaadhi mbali dhAaisraeli sho oomwenyo dhadho dha li moshiponga. Oshizemo, omukiintu ngoka inaa gwanenena, ngoka kaa li Omuisraeli, okwa li a ulike kutya omuyuuki, ngaashi Abraham. Oshiholelwa shoka a tula po otashi tsu omuthindo kutya osha simana okukala wu na eitaalo li na iilonga. w23.12 5-6 ¶12-13

Tu li Aakriste, inatu gwanenwa owala kokuuva ko omalongo gopetameko gOmbiimbeli. Otwa halelela okwiilonga iinima ‘ayihe yomuule womadhiladhilo gaKalunga’ kekwatho lyombepo ye ondjapuki. (1 Kor. 2:9, 10) Omolwashike itoo tameke nokukonakona muule iinima mbyoka tayi ku hedhitha popepi naJehova? Pashiholelwa, oto vulu okukonakona muule nkene a li a ulukile ohole aapiya ye yonale nonkene a ulika kutya oku ku hole wo. Oto vulu wo okukonakona nkene Jehova a li a hala Aaisraeli ye mu longele, e to shi yelekanitha nankene a hala Aakriste ye mu longele kunena. Nenge oto vulu okukonakona uuyelele wu na ko nasha nomahunganeko ngoka Jesus a gwanitha po pethimbo lyonkalamwenyo ye kombanda yevi. Oto vulu okumona enyanyu olindji mokukonakona iikundathanwa mbyoka to longitha embo Watch Tower Publications Index, nenge Embo lyokukonga uuyelele lyOonzapo dhaJehova. Okuninga ekonakonombiimbeli lyomuule otaku vulu oku ku kwathela wu koleke eitaalo lyoye noku ku kwathela wu ‘mone ontseyo yokutseya Kalunga.’ — Omayel. 2:4, 5. w23.10 18-19 ¶3-5

Uutumbulilo “nomwenyo aguhe” mboka omuyapostoli Petrus a longitha otawu ti lelalela “okunanunuka.” Oshitopolwa oshitiyali shovelise ndjoka osha popya kutya okukala tu hole yalwe nomwenyo aguhe ohaku tu inyengitha tu siikile omayono gaamwatate. Otatu vulu oku shi thaneka ngeyi: Ohole yetu nayi kale ya fa oshilapi shoka hashi vulu okutamunuka mo, twe shi kwata nomake getu agehe, e tatu shi nanununa mo noku shi nanununa mo ishewe sigo sha siikile “omayono ogendji,” ihe hayono owala limwe nenge gaali. Oshitya “siikile” otashi ti owala kutya okudhimina po. Ngaashi owala oshilapi hashi vulu okusiikila mpoka pwa kaka, nohole ohayi vulu okusiikila omaunkundi nokwaagwanenena kwayalwe. Ohole yetu oyi na okukala ya kola lela, opo tu vule okudhima po omapuko gokwaagwanenena gooitaali ooyakwetu kutya nduno omathimbo gamwe otashi pula oonkambadhala dha mana mo. (Kol. 3:13) Uuna hatu shi pondola mokudhimina po yalwe, kungawo otatu ulike kutya ohole yetu oya kola nosho wo kutya otwa hala okunyanyudha Jehova. w23.11 11-12 ¶13-15

Sho omukwaniilwa Josia a li e na omimvo 26, okwa tameke okwoopalekulula otempeli. Manga ya ipyakidhila niilonga, oya li yi itsu “embo lyompango yOmuwa, ndjoka Omuwa a gandjele kuMoses.” Sho lya leshwa, omukwaniilwa okwa ningi omalunduluko nziya, opo a vulike kwaashoka sha nyolwa mo. (2 Ondjal. 34:14, 19-21) Mbela owa hala okukala ho lesha Ombiimbeli pandjigilile? Nongele oho shi ningi nale, mbela oho tyapula ngaa oku yi lesha? Mbela oho ndhindhilike ngaa omanyolo ngoka taga vulu oku ku kwathela pauhandimwe? Sho Josia a li e na omimvo 39, okwa ningi epuko ndyoka lya pula omwenyo gwe. Okwa li a inekela muye mwene pehala lyokupula ewiliko kuJehova. (2 Ondjal. 35:20-25) Oshiilongomwa oshini? Kashi na nduno mbudhi kutya otu na omimvo ngapi nenge otwa kala tatu konakona Ombiimbeli uule womimvo dhi thike peni, otwa pumbwa okutsikila okulongela Jehova nuudhiginini. Shono osha kwatela mo oku mu galikana pandjigilile e tu wilike, okukala hatu konakona Oohapu dhe nokupulakena komayele ngoka tatu pewa kAakriste ya pyokoka. Ngele otwa ningi ngawo, otatu ka kala twa nyanyukwa noitatu ka ninga omayono ga kwata miiti. — Jak. 1:25. w23.09 12 ¶15-16

Ombiimbeli oya tumbula aakiintu oyendji mboka ya li ye hole noya longela Jehova. Oya li ye na ‘omikalo omiwanawa noye na oshili miinima ayihe.’ (1 Tim. 3:11) Kakele kawo, momagongalo getu kunena namo omu na aakiintu Aakriste ya pyokoka, mboka aamwameme aagundjuka taya vulu okuholela. Aamwameme aagundjuka, omolwashike itaamu tala kutya aakiintu Aakriste ya pyokoka yeni megongalo lyeni tamu vulu okuholela? Taleni komaukwatya gawo omawanawa, opo nduno tamu tala nkene tamu vulu okuholela omaukwatya gawo. Uukwatya wa simana mboka tawu ndhindhilikitha mo Omukriste ngoka a koka pambepo owo eifupipiko. Ngele omukiintu omwiifupipiki, ota ka kala e na ekwatathano ewanawa naJehova nosho wo nayalwe. Pashiholelwa, omukiintu ngoka e hole Jehova oha tula miilonga neifupipiko ekotampango li na ko nasha nuukwamutse, ndyoka He gwomegulu a tula po. (1 Kor. 11:3) Ekotampango ndyoka otali longo megongalo nomomagumbo. w23.12 18-19 ¶3-5

Jehova okwa tegelela omusamane a kale e hole omukulukadhi gwe noku mu sila oshimpwiyu palutu, pamadhiladhilo nopambepo. Ngele owa kala ho dhiladhila pandunge, ho simaneke aakiintu nokukala omwiinekelwa, otashi ke ku kwathela wu kale omusamane e li nawa. Ngele owa hokana, otashi vulika wu ninge omuvali. Oshike to vulu okwiilonga kuJehova kombinga yokukala omuvali e li nawa? (Ef. 6:4) Jehova okwa li a popi sha yela ta lombwele Omwana, Jesus, kutya oku mu hole nokwe mu hokwa. (Mat. 3:17) Ngele owa ningi omuvali, shilipaleka kutya oho lombwele aluhe aamwoye kutya owu ya hole. Kala aluhe ho ya pandulile iinima iiwanawa mbyoka ya ninga. Ootate mboka haya landula oshiholelwa shaJehova, ohaya kwathele oyana ya ninge aalumentu naakiintu Aakriste ya pyokoka pambepo. Oto vulu okwiilongekidhila ngashingeyi oshinakugwanithwa shika, mokukala ho sile oshimpwiyu yalwe maandjeni nomegongalo nomokwiilonga oku ya lombwela kutya owu ya hole nowe ya pandula. — Joh. 15:9. w23.12 28-29 ¶17-18

Nonando otu li aapiya yaJehova aadhiginini, ohatu adhika komaupyakadhi nohatu ehama ngaashi owala aantu ayehe. Otashi vulika wo tu kale twa pumbwa okwiidhidhimikila omapataneko, nenge omahepeko okuza kwaamboka ye tonde oshigwana shaKalunga. Nonando Jehova ihe tu gamene komaupyakadhi ngoka, oku uvaneka kutya ote ke tu kwathela. (Jes. 41:10) Kekwatho lye, otatu vulu okukaleka po enyanyu lyetu, okuninga omatokolo omawanawa nokukala aadhiginini nokuli nuuna twa taalela oonkalo oondhigu noonkondo. Oku uvaneka oku tu pa shoka Ombiimbeli tayi ithana ‘ombili yaKalunga.’ (Fil. 4:6, 7) Ombili ndjoka, ombili yopamadhiladhilo noyokomutima, ndjoka hatu kala tu na, molwaashoka tu na ekwatathano lyopothingo naKalunga. Ombili ndjoka “yi vule uunongo auhe wopantu,” ito yi pewa komuntu. Mbela opu na oshikando shimwe wa galikanene kuJehova waa na ezimbuko e to kala wu uvite ombili? Owa li wu uvite ngawo, molwaashoka Jehova okwe ku pa ‘ombili’ ye. w24.01 20 ¶2; 21 ¶4

Ohole yokuhola Kalunga ohayi inyengitha aantu aadhiginini ya simaneke edhina lye tashi zi komutima. Omukwaniilwa David okwa li e uvite ko kutya ngele ta simaneke edhina lyaJehova, nena oJehova mwene ta simaneke. Edhina lyaJehova olya kwatela mo ondondo ye, onkene ohali tu dhimbulukitha omaukwatya ge agehe omawanawa niilonga ye iikumithi. David okwa li a tala ko edhina lyaTate gwe li li eyapuki nokwa hala oku li simaneka. Okwa li a hala oku shi ninga ‘naashihe shoka shi li muye,’ ano tashi zi komutima. Sha faathana, Aalevi oya li ya kwatele komeho mokutanga Jehova. Oya li ye shi zimina kutya edhina lyaJehova olya gwana okukala eyapuki. (Neh. 9:5) Osha yela kutya oku mu simaneka neifupipiko notashi zi komutima, ohashi nyanyudha omutima gwaJehova. w24.02 9 ¶6

Jehova ite ke ku tala ko kutya owa ndopa, ngele ino adha elalakano ndyoka wa li itoo vulu oku li adha. (2 Kor. 8:12) Ilonga kiikando mbyoka hapu ningwa sha, shoka hashi ku imbi wu adhe elalakano lyoye. Kaleka momadhiladhilo shoka wa pondola nale musho. Ombiimbeli otayi ti kutya ‘Kalunga oku shi kwiinekelwa. Ita dhimbwa iilonga yoye.’ (Heb. 6:10) Onkee nangoye ino yi dhimbwa. Dhiladhila kwaashoka wa pondola nale musho. Otashi vulika wa kokeka ekwatathano lyoye naJehova, wa lombwela yalwe kombinga ye nenge wa ninginithwa. Ngaashi owala wa li wa ningi ehumokomeho e to adha omalalakano goye gopambepo monakuziwa, oto vulu okutsikila okuninga ehumokomeho wu adhe elalakano ndyoka wi itulila po ngashingeyi. Kekwatho lyaJehova, oto vulu okwaadha elalakano lyoye. Sho to tsikile okulonga nuudhiginini wu adhe elalakano lyoye, aluhe kambadhala okumona nkene Jehova te ku kwathele note ku yambeke sho to longo wu li adhe. (2 Kor. 4:7) Ngele ino shuna omutse miipeta, oto ka mona omayambeko nokuli ge vulithe pwaangoka. — Gal. 6:9. w23.05 31 ¶16-18

Jehova oku hole okuulukila mboka e hole noonkondo kutya okwe ya hokwa. Omanyolo oge shi popya lwiikando iyali, sho Jehova a li a lombwele Jesus kutya ye Omwana omuholike e mu hokwa. (Mat. 3:17; 17:5) Mbela owa hala okuuva Jehova te ku lombwele kutya okwe ku hokwa? Jehova iha popi natse okuza megulu, ihe oha popi natse okupitila mOohapu dhe. Ohatu vulu ‘okuuva’ ewi lye tali ti kutya okwe tu hokwa, uuna tatu lesha oohapu dhaJesus mOmavaangeli. Jesus okwa li a holele omaukwatya gaHe thiluthilu. Onkee ano uuna tatu lesha kutya Jesus okwa li a lombwele aalanduli ye inaaya gwanenena, ihe aadhiginini, kutya okwe ya hokwa, otatu vulu okukala twa fa tu wete Jehova te tu lombwele oohapu ndhoka. (Joh. 15:9, 15) Uuna twi iyadha tu li momashongo itashi ti kutya Jehova ine tu hokwa we. Pehala lyaashono, omashongo ohage tu pe ompito tu ulike kutya ohole yetu yokuhola Kalunga oyi thike peni nosho wo einekelo lyetu muye. — Jak. 1:12. w24.03 28 ¶10-11