Auguste

Ndhindhilika iitsa ya simana mbyoka yi li mEpisalomi ndika: (1) Aayuuki ohaya adhika komaupyakadhi. (2) Jehova ohe tu hupitha momaupyakadhi getu. Jehova ohe tu hupitha ngiini? Omukalo gumwe omoku tu kwathela tu kale tu na etaloko li li mondjila lyonkalamwenyo muuyuni mbuka. Nonando Jehova okwe tu uvanekela kutya otatu vulu okukala nonkalamwenyo ombwanawa sho tatu mu longele, ina tya kutya itatu adhika komaupyakadhi kunena. (Jes. 66:14) Ohe tu ladhipike tu gandje eitulomo konakuyiwa yetu, ano kethimbo ndyoka tatu ka kala tu na onkalamwenyo ndjoka a hala tu kale tu na sigo aluhe. (2 Kor. 4:16-18) Ihe ngashingeyi ohe tu kwathele tu tsikile oku mu longela esiku kehe. (Oontak. 3:22-24) Oshike tatu vulu okwiilonga miiholelwa yaalongeli yaJehova aadhiginini yopethimbo lyOmbiimbeli nosho wo yopethimbo lyetu? Otashi vulika tu iyadhe momaupyakadhi ombadhilila. Ihe uuna twi inekela muJehova, ote ke tu kwathela. — Eps. 55:22. w23.04 14-15 ¶3-4

Otatu vulu okwiilonga koshiholelwa shaJosef naMaria, mboka ya li ye na ehalo okuvulika kaakwanepangelo nuuna sha li oshidhigu. (Luk. 2:1-6) Sho Maria a li e li metegelelo lyoomwedhi omugoyi lwaampono, ye naJosef oya li ya taalela emakelo li na ko nasha nokuvulika. Omupangeli Augustus, okwa li a gandja elombwelo kutya ayehe mboka ye li mepangelo lyaRoma oye na okushuna kiilando yawo ye ka inyolithe. Josef naMaria oya li ye na okweenda olweendo olule lwokuya kuBetlehem, mpoka pwa li pu na ookilometa 150, taya piti momasilu nomiikulundundu. Olweendo ndoka olwa li oludhigu, unene tuu kuMaria. Aaihokani mboka otashi vulika ya li taya ipula shi na ko nasha negameno lyaMaria nolyokanona kawo hoka inaaka valwa natango. Ongiini ngele okwa adhika koshitheta manga ye li mondjila? Maria okwa li e li metegelelo lyaMesiasa gwomonakuyiwa. Ihe mbela shoka osha li tashi ke ya imba ya vulike kepangelo? Nonando Josef naMaria oya li ye na omaipulo, oya li ya vulika kompango. Jehova okwa li e ya yambeke molwaashoka oya li ya vulika. Maria okwa thiki nawa muBetlehem, okwa mono okanona ke na uukolele, naashoka osha li sha kwathele nokuli opo ehunganeko lyOmbiimbeli li gwanithwe. — Mika 5:2. w23.10 8 ¶9; 9 ¶11-12

Oshike to vulu okuninga, ngele oho kala wa tila noonkondo okugandja omatyokosha pokugongala? Otashi vulika shi ku kwathele ngele owa ilongekidha nawa. (Omayel. 21:5) Ngele owa kala wu shi nawa uuyelele mboka tawu kundathanwa, otashi ka kala oshipu kungoye okwiiyamba wu gandje omatyokosha. Shimwe ishewe, omatyokosha goye ga ninga omafupi. (Omayel. 15:23; 17:27) Otashi vulika kuu kale wa tila ngele to gandja eyamukulo efupi. Ngele owa ningi etyokosha efupi niitya yoye mwene, oto ka ulika kutya owa ilongekidha nawa nowu uvite ko nawa shoka tashi kundathanwa. Ongiini nduno ngele owa kambadhala omaetopo agehe ngoka, ihe natango oho kala wa tila unene okugandja etyokosha limwe nenge gaali? Kala wu na uushili kutya Jehova ota ka pandula oonkambadhala ndhoka ho ningi wa mana mo. (Luk. 21:1-4) Jehova ina tegelela tu ninge shoka itaatu vulu okuninga. (Fil. 4:5) Tala kutya oshike to vulu okuninga, itulila po elalakano wu shi adhe, opo nduno galikana wu kale wu na omutima gwa ngungumana. Petameko, elalakano ndyoka otali vulu okukala okugandja etyokosha limwe efupi. w23.04 21 ¶6-8

Omuyapostoli Paulus ote tu yelekanitha naakwiita mboka ya tonata, noya zala ya ilongekidhila olugodhi. Uuna pu na iita, aantu ohaya kala ya tegelela omukwiita a kale a ilongekidhila olugodhi ethimbo kehe. Natse otu li monkalo ya faathana. Otu na okukala twa ilongekidhila esiku lyaJehova, mokukala twa zala eitaalo nohole ongehuyanza, netegameno ongegala lyosheela. Ehuyanza ohali gamene omutima gwomukwiita. Eitaalo nohole ohayi gamene omutima gwetu gwopathaneko. Ohayi tu kwathele tu kale tatu longele Kalunga nokulandula Jesus. Eitaalo ohali tu kwathele tu kale tu na uushili kutya Jehova ota ka futa mboka taye mu kongo nomutima aguhe. (Heb. 11:6) Otali ke tu kwathela tu kale aadhiginini kOmuwiliki gwetu, Jesus, nonando otu li moonkalo oondhigu. Otatu vulu okukoleka eitaalo lyetu, opo tu vule okwiidhidhimikila omaupyakadhi, mokwiilonga kiiholelwa yaantu yopethimbo lyetu mboka ya li ya kakatela uudhiginini wawo, nonando otaya hepekwa, nenge taya hupu shokadhila. Otatu vulu wo okuyanda omwigo gwokuhola omaliko, mokuholela mboka ya kaleka onkalamwenyo yawo paunathangwa, opo ya vule okupititha komeho Uukwaniilwa. w23.06 10 ¶8-9

Eipangelo uukwatya womuntu wokuvula okupangela omaiyuvo ge noonkatu dhe. Otwe li pumbwa opo tu adhe omalalakano getu, unene tuu ngele elalakano lyontumba edhigu okwaadha nenge kaatu na lela ehalo lyoku shi ninga. Dhimbulukwa kutya eipangelo oli li oshitopolwa shiiyimati yombepo ondjapuki. Onkee pula Jehova e ku pe ombepo ndjoka yi ku kwathele, wu kokeke uukwatya mboka wa simana. (Luk. 11:13; Gal. 5:22, 23) Ino tegelela oonkalo dhi li nawa. Muuyuni mbuno, oonkalo otashi vulika kaadhi ka kale nawa nando. Ngele otwa tegelele, otashi vulika kaatu adhe elalakano lyetu. Otashi vulika tu kale kaatu na lela ehalo lyokwaadha elalakano lyetu, molwaashoka tali monika lya fa edhigu okwaadha. Ngele nokungoye osho shi li ngawo, oto vulu okwaadha elalakano lyoye, to endele ko kashona nakashona. Ngele elalakano lyoye okukokeka uukwatya wontumba, omolwashike itoo endele ko to wu ulike kashona nakashona? Ngele elalakano lyoye okulesha Ombiimbeli ayihe, omolwashike ito itulile po elandulathano lyoku yi lesha ethimbo efupi? w23.05 29 ¶11-13

Momukokomoko gwomasiku gahugunina, Jehova okwa kala nokulongitha ehangano lye li tsikile okugandja omalombwelo okuza mOohapu dhaKalunga, ngoka tage tu kwathele tu tsikile okweenda ‘mOndjila ondjapuki.’ (Jes. 35:8; 48:17; 60:17) Uuna omuntu gwontumba a taamba ko ekonakonombiimbeli, nena oku na ompito yokweenda ‘mOndjila ondjapuki.’ Yamwe ohaya ende monenendjila ndjoka oshinano oshifupi e taya zi mo. Yalwe ohaya tokola toko okutsikila okweenda mo sigo ya thiki hoka taya yi. Mbela otaya yi peni? Kwaambono ye na etegameno lyoku ka kala megulu, “Ondjila ondjapuki” otayi yi ya fala “mOparadisa yaKalunga” megulu. (Eh. 2:7, NW) Kwaambono ye na etegameno lyoku ka kala kombanda yevi, onenendjila ndjoka otayi ke ya fala megwaneneno pehulilo lyomimvo 1 000. Ngele oto ende monenendjila ndjoka kunena, ino tala konima. Shimwe ishewe, ino za mo muyo sigo wa mana olweendo lwoye lwokuya muuyuni uupe. w23.05 17 ¶15; 19 ¶16-18

Ngele owa dhiladhila kwaashihe shoka Jehova e ku ningila, oto ka kala we mu pandula nowa hala oku mu iyapulila. (Eps. 116:12-14) Ombiimbeli oya ti kutya Jehova oye Omugandji ‘gwoshipewa kehe oshiwanawa nomagano kehe ga gwana ga pwa.’ (Jak. 1:17) Eyambo lyOmwana gwe, Jesus, olyo limwe lyomomagano ngoka ga dhenga mbanda. Dhiladhila kunkene omagano ngoka omakumithi. Ekuliloyambo olye shi ningitha tashi wapa wu kale wu na ekwatathano lyopothingo naJehova. Okwe ku pa wo etegameno lyokukala nomwenyo sigo aluhe. (1 Joh. 4:9, 10) Ngele owa iyapulile Jehova, kungawo oto ka ulika kutya owa pandula omolwohole ya dhenga mbanda ndjoka e ku ulukila nosho wo omalalekonuuyamba galwe ngoka e ku pa. — Deut. 16:17; 2 Kor. 5:15. w24.03 5 ¶8

Shi na ko nasha nomithikampango dhopamikalo ndhoka tadhi humithwa komeho kuuyuni mbuka, ohatu kala tu uvite ngaashi Lot a li e uvite. Okwa “li u uvite nayi kuukeeneidhiliko waakeenompango,” molwaashoka okwa li e shi kutya Tate yetu gwomegulu oku tonde eihumbato ewinayi. (2 Pet. 2:7, 8) Molwaashoka Lot okwa li a simaneka noonkondo Kalunga noku mu hole, oshe mu inyengitha a kale e tonde eihumbato inaali yogoka lyaantu mboka ye mu kundukidha. Ngaashi Lot, natse otwa kundukidhwa kaantu mboka inaaya simaneka lela nenge nandonando omithikampango dhaJehova dhopamikalo. Nando ongawo, otatu vulu okukala twa yogoka pamikalo, ngele otwa kala tu hole Kalunga nokwiilonga okukala twe mu simaneka noonkondo. Jehova ohe tu kwathele tu shi ninge okupitila metsomukumo ndyoka tali adhika mOmayeletumbulo. Aakriste ayehe, aalumentu naakiintu, aagundjuka naakokele, otaya vulu lela okumona uuwanawa mokukonakona omayele gopandunge ngoka taga adhika mo. Ngele ohatu tila Jehova itatu ka panga uukuume naamboka haya ningi iinima iiwinayi. w23.06 20 ¶1-2; 21 ¶5

Otashi vulika ho patanekwa kaantu yaandjeni, nenge tashi vulika wa yamba po iinima yopamaliko, opo wu pitithe Uukwaniilwa komeho. (Mat. 6:33) Ngele osho, oto vulu okukala nuushili kutya Jehova oku wete iilonga yoye yuudhiginini. (Heb. 6:10) Otashi vulika wa mona uushili woohapu ndhoka tadhi ti: “Kapu na ngoka a thiga po egumbo lye, nenge aamwayinamati, nenge aamwayinakadhona, nenge yina, nenge he, nenge oyana, nenge epya lye omolwandje nomolwonkundana ombwanawa, a kale ando itaa mono lwethele muuyuni mbuka omagumbo, aamwayinamati, aamwayinakadhona, ooyina, oyana, omapya, pamwe nomahepeko, nomuuyuni tawu ya omwenyo gwaaluhe.” (Mark. 10:29, 30) Omalalekonuuyamba ngoka wa mona, oge vule kokule omaiyambo ngoka wa ninga. — Eps. 37:4. w24.03 9 ¶5

Sho Aakriste yomuJudea ya li ya adhika kondjala onene, aamwatate yomegongalo lyomuAntiokia oya “tokola kutya kehe gumwe gwomuyo na gandje iikwatha ngaashi ta vulu, opo yi tuminwe aamwayina meitaalo mbeyaka ya kala muJudea.” (Iil. 11:27-30) Nonando aamwatate mboka ya adhika kondjala oya li haya kala kiitopolwa yimwe yokokule, Aakriste yomuAntiokia oya li ya tokola oku ya kwathela. (1 Joh. 3:17, 18) Natse otatu vulu okuulika olukeno kunena, ngele otwa uvu kutya ooitaali ooyakwetu oya gumwa kiiponga yopaunshitwe. Ohatu gandja nziya omakwatho, tashi vulika mokupula aakuluntugongalo ngele otatu vulu okukwathela moproyeka yontumba, mokugandja omayambidhidho giilonga yomuuyuni awuhe, nenge mokugalikanena mboka ya dhengwa kiiponga yopaunshitwe. Aamwatate naamwameme nayo wo otashi vulika ya pumbwa ekwatho, opo ya vule okumona iinima mbyoka ya pumbwa. Sho Omukwaniilwa gwetu, Jesus Kristus, te ke ya okupangula aantu, otashi vulika tu kale twa hala e tu ulukile olukeno noku tu hiye tu “thigulule Uukwaniilwa” waKalunga. — Mat. 25:34-40. w23.07 4 ¶9-10; 6 ¶12

Jesus okwa li a holele uukwatya waJehova wondjele. Okwa li a tumwa kombanda yevi a uvithile ‘oonzi ndhoka dha kana dhomAaisraeli.’ Ihe okwa li a ulike kutya oku na ondjele sho ta gwanitha po oshinakugwanithwa she shoka. Oshikando shimwe omukiintu kee shi Omuisraeli okwa li e mu indile a aludhe omwanakadhona ngoka a li ta “hepekwa nayi kompwidhuli.” Jesus omolwolukeno lwe okwa aludha omwanakadhona gwomukiintu ngoka. (Mat. 15:21-28) Tala ishewe oshiholelwa shilwe. Petameko lyuukalele we, Jesus okwa li a popi a ti: “Ngoka ti idhimbike ndje . . . , nangame wo otandi mu idhimbike.” (Mat. 10:33) Ihe mbela okwa li ngaa i idhimbike Petrus ngoka a li e mu idhimbike lutatu? Aawe. Jesus okwa li e shi kutya Petrus oku uvitile nayi shoka a ningi nonokutya ye omulumentu omudhiginini. Konima sho Jesus a yumudhwa, okwa ihololele Petrus notashi vulika a li e mu shilipaleke lela kutya okwe mu dhimina po noku mu hole. (Luk. 24:33, 34) Jehova Kalunga naJesus Kristus ayehe oye na ondjele. Ongiini kombinga yetu? Jehova okwa tegelela natse tu kale tu na ondjele. w23.07 21 ¶6-7

Oshike she tu tompa tu lombwele yalwe kutya euvaneko lyaKalunga li na ko nasha nOparadisa otali ka gwanithwa shili? Etompelo lyotango, Jehova ye mwene oye a ninga euvaneko ndyoka. Ehololo olya ti: “Ngoka a kuutumba koshipangelapundi okwa popi a ti: ‘Tala, ngashingeyi iinima ayihe otandi yi ningi iipe.’” Jehova oku na uunongo, oonkondo nosho wo ehalo lyokugwanitha po euvaneko lye. Etiyali, kehe shimwe shoka Jehova a uvaneka kutya otashi ka gwanithwa, pataloko lye ohashi kala sha fa sha gwanithwa nale. Nomolwaashoka a popya mOmbiimbeli a ti: ‘Oohapu ndhika, odhoshili. . . . Sha gwanithwa!’ Etitatu, uuna Jehova a tameke oshinima shontumba ohe shi longo sigo sha pu thiluthilu, ngaashi sha kolekwa kuutumbulilo mboka tawu ti: “Ongame Alfa naOmega.” (Eh. 21:6) Jehova ote ke shi ulika kutya Satana omufundja, noita vulu okuya elalakano lye moshipala. Uuna gumwe a pula ta ti: “Oohapu ndhoka otadhi ka gwanithwa ngaa shili?” Oto vulu oku mu leshela noku mu yelithila Ehololo 21:5, 6. Mu kwathela a mone kutya Jehova ota ka gwanitha po shili euvaneko lye. — Jes. 65:16. w23.11 7 ¶18-19

Jehova okwa li a gwanithile Abraham euvaneko ndyoka sho a li e na omimvo 75 kee e na natango okanona. Mbela Abraham okwa li a mono sho euvaneko ndyoka tali gwanithwa? Ine li mona naanaa. Konima sho a taaguluka omulonga gwaEufrat nokonima sho a kala a tegelela uule womimvo 25, okwa mono nkene okamwanamati, Isak, ka valwa pashikumithalonga, nokonima yomimvo dhilwe 60, aatekulu, Esau naJakob oya valwa. (Heb. 6:15) Ihe Abraham ina mona nando oluvalo lwe talu indjipala naasho talu thigulula Evi lyEuvaneko. Nando ongawo, omulumentu ngoka omudhiginini okwa li e na ekwatathano lyopothingo nOmushiti gwe. (Jak. 2:23) Sho Abraham ta ka yumudhwa, ota ka kala a nyanyukwa okutseya kutya eidhidhimiko lye, olya etela aantu yomiigwana ayihe omalaleko nuuyamba. (Gen. 22:18) Shono otashi tu longo shike? Otashi vulika kaatu mone omauvaneko gaJehova taga gwanithwa ngashingeyi. Nonando ongawo, ngele otu na eidhidhimiko ngaashi Abraham, otatu vulu okukala tu na uushili kutya Jehova ote ke tu pa ondjambi ngashingeyi nosho wo muuyuni we uupe mboka e tu uvanekela. — Mark. 10:29, 30. w23.08 24 ¶14

Sho omukwaniilwa Ussia a li omugundjuka, okwa li omwiifupipiki nokwa “longele Omuwa nuudhiginini.” Okwa kala nomwenyo uule womimvo 68, na Jehova okwa li e mu laleke nuuyamba monkalamwenyo ye. (2 Ondjal. 26:1-4) Ussia okwa li a sindi iigwana oyindji mbyoka ya li aatondi yawo nokwa shilipaleke kutya Jerusalem osha gamenwa. (2 Ondjal. 26:6-15) Okwa li shili a nyanyukwa omolwaashihe shoka Kalunga e mu kwathela a pondole. (Omuuv. 3:12, 13) Omukwaniilwa Ussia okwa li a igilila okugandja omalombwelo kaantu. Otashi vulika shoka sha li she mu ningitha a kale e na omutse omunene, ye ta kala e uvite kutya ota vulu okuninga kehe shoka a hala. Esiku limwe, Ussia okwa li a tokola a ye motempeli, e ta kambadhala okufika iitsinino ketsininoyambelo, oshinima shoka aakwaniilwa ya li inaaya pitikwa ya ninge. (2 Ondjal. 26:16-18) Omuyambi Omukuluntu Azaria okwa li a kambadhala oku mu pukulula, ihe Ussia okwa geye noonkondo. Shinikitha oluhodhi, Ussia ina kala we omudhiginini, na Jehova okwe mu geele nuuvu woshilundu. (2 Ondjal. 26:19-21) Onkalamwenyo ye oya li tayi vulu okukala ombwanawa ando okwa kalele omwiifupipiki. w23.09 10 ¶9-10

Nokuli nokonima sho omuyapostoli Petrus a ningi Omukriste omugwayekwa, okwa li natango ta kondjo nuunkundi we. Momumvo 36 E.N., Petrus opo a li sho Kornelius, ngoka kee shi Omujuda noina kenkwa, a gwayekwa nombepo ondjapuki, oshinima shoka sha li sha gandja uumbangi wa yela kutya “Kalunga aantu ayehe ohe ya tala ye thike pamwe,” nonokutya mboka kaaye shi Aajuda otaya vulu okuya megongalo lyopaKriste. (Iil. 10:34, 44, 45) Konima yaashono, Petrus okwa tameke okulya pamwe naamboka kaaye shi Aajuda, oshinima shoka inaa ninga nando onale. Ihe Aakriste yamwe Aajuda oya li ye uvite kutya Aajuda naamboka kaaye shi Aajuda kaye na okulya pamwe. Uuna yamwe mboka ye na etaloko lya tya ngawo ye ya kuAntiokia, Petrus okwa li ha etha okulya pamwe naamwahe mboka kaaye shi Aajuda, tashi vulika a li a tila okupundukitha Aakriste Aajuda. Omuyapostoli Paulus okwa li a mono uufudhime waPetrus, e te mu ganda montaneho yaantu. (Gal. 2:13, 14) Nonando okwa li a ningi epuko ndyoka, okwa tsikile okukala e na omukumo. w23.09 22 ¶8

Ngele owi ikonakona paushili, otashi vulika wu mone mpoka wa pumbwa okuninga omalunduluko, ihe ino teka omukumo. nokumona kutya openi wa pumbwa okuhwepopala, ihe ino teka omukumo. ‘Omuwa omwaanawa’ note ke ku kwathela wu hwepopale. (1 Pet. 2:3) Omuyapostoli Petrus okwe tu shilipaleka a ti: ‘Kalunga ote mu longekidha, te mu pe oonkondo.’ Oshikando shimwe Petrus okwa li e wete kutya ina gwana okukala pOmuna gwaKalunga. (Luk. 5:8) Ihe kekwatho lyopahole lyaJehova nolyaJesus, Petrus okwa tsikile okukala omulanduli gwaKristus. Kungawo, Jehova okwa pitike Petrus a ye “mOshilongo shaaluhe shOmuwa gwetu noshOmukulili Jesus Kristus.” (2 Pet. 1:11) Shoka kasha li tuu elaleko nuuyamba! Ngele owa tsikile okukala omudhiginini ngaashi Petrus e to etha wu dheulwe kuJehova, nangoye oto ka mona ondjambi yomwenyo gwaluhe. ‘Oto ka adha elalakano lyeitaalo lyoye.’ — 1 Pet. 1:9. w23.09 31 ¶16-17

Etsalihangano lyopethimbo lyonale olya li li na olugumbo lwehale lwa mbwalangandja moka aayambi ya li haya longele iilonga yawo. Metsalihangano omwa li mu na oshiyambelo oshinene shoshikushu noshiyaha shoshikushu shi na omeya, moka aayambi ya li haya iyogo manga inaaya tameka okulonga iilonga yawo iiyapuki. (Eks. 30:17-20; 40:6-8) Kunena oshihupe shaamwahe yaKristus ohaya longo nuudhiginini molugumbo lwehale lyomeni lyotempeli yopambepo. Oshiyaha oshinene shomeya, shoka sha li metsalihangano nomotempeli, osha li hashi ya dhimbulukitha nosho wo Aakriste ayehe kutya oye na okukala ya yogoka palutu nopambepo. Mbela “engathithi lyaantu”ohali longele Kalunga peni? Omuyapostoli Johannes okwa li e ya mono ‘ya thikama ya taalela koshipangelapundi,’ hoka taku thaneke olugumbo lwehale lwopondje, moka ‘taya yakula Kalunga uusiku nomutenya motempeli ye.’ (Eh. 7:9, 13-15) Otwa pandula noonkondo sho Jehova e tu pa ompito ya simanenena yoku mu longela. w23.10 28 ¶15-16

Omukalo gumwe moka Jehova he tu nkondopaleke, okupitila maakuluntugongalo. (Jes. 32:1, 2) Onkee ano uuna wu uvite wa gwililwa po, lombwela aakuluntugongalo kutya omolwashike wu uvite wa gwililwa po. Uuna taye ku pe ekwatho, li taamba ko nolupandu. Jehova ota vulu oku ku nkondopaleka okupitila muyo. Etegameno lyetu lya kankamena kOmbiimbeli li nako nasha nomwenyo gwaaluhe moparadisa ombwanawa kombanda yevi, nenge mUukwaniilwa womegulu, otali vulu oku tu nkondopaleka. (Rom. 4:3, 18, 19) Etegameno lyetu ohali tu kwathele tu idhidhimikile omamakelo, tu uvithe onkundana ombwanawa notu gwanithe po iinakugwanithwa ya yoolokathana megongalo. (1 Tes. 1:3) Etegameno olyo tuu ndyono olya li lya nkondopaleke omuyapostoli Paulus. Okwa li e li ‘muudhigu owundji,’ e li “momalimbililo,” e na “aatondi oyendji” nokwa “hepekwa unene.” Omwenyo gwe nago ogwa li nokuli moshiponga. (2 Kor. 4:8-10) Paulus okwa li a mono oonkondo dhokwiidhidhimika mokukala ta gandja eitulomo ketegameno lye. (2 Kor. 4:16-18) Okwa li a gandja eitulomo ketegameno lye lyonakuyiwa lyoku ka kala nomwenyo sigo aluhe megulu. Paulus okwa li a tedhatedha ketegameno ndyoka, nokungawo okwa li a ‘ningwa omupe esiku kehe.’ w23.10 15-16 ¶14-17

Uuna to galikana, tala ngele ndyoka olyo ngaa ethimbo lyaJehova lyokuyamukula eindilo lyoye?’ Ohashi vulika tu kale tu uvite kutya Jehova okwa pumbwa okuyamukula omagalikano getu nziya ngaashi tashi vulika. Jehova ohe tu kwathele pethimbo lya opala. (Heb. 4:16) Uuna inaatu pewa nziya shoka twa pula, otashi vulika tu kale tu uvite kutya Jehova ina zimina shoka twa pula. Ihe eyamukulo otali vulu okukala ‘tegelela ko manga.’ Pashiholelwa, omumwatate omugundjuka okwa pula megalikano a aludhwe kuuvu we. Ihe uuvu we inawu hwepopala. Andola Jehova okwe mu aludhile pashikumithalonga, nena Satana ota vulu okutompathana kutya omumwatate ota tsikile okulongela owala Jehova, molwaashoka e mu aludha. (Job 1:9-11; 2:4) Shimwe ishewe, Jehova okwa tula po nale ethimbo ndyoka ta ka aludha omikithi adhihe. (Jes. 33:24; Eh. 21:3, 4) Omanga tali thiki, inatu kala twa tegelela tu aludhwe pashikumithalonga. Onkee ano omumwatate ngoka ota vulu okupula Jehova e mu pe oonkondo nosho wo ombili yopamadhiladhilo, opo a vule okwiidhidhimikila omukithi ngoka e na nokutsikila oku mu longela nuudhiginini. w23.11 24 ¶13

Nonando Simson okwa li a ningi epuko lya kwata miiti, okwa tsikile okulongela Jehova. Okwa kongo ompito a kondjithe Aafilisti, oshoka osho Jehova a li a hala a ninge. (Aatok. 16:28-30.) Simson okwa li a indile Jehova a ti: ‘Nandi geele Aafilisti.’ Kalunga kashili okwa li a yamukula egalikano lyaSimson, e te mu pe ishewe oonkondo pashikumithalonga. Oshizemo, Simson okwa dhipaga Aafilisti oyendji poshikando shika, shi vulithe nale. Nonando Simson okwa li a mono iilanduliko yi yemateka omolwepuko lye, ina etha po okukambadhala okulonga ehalo lyaJehova. Sha faathana, natse ngele otwa ningi epuko e tatu pukululwa nenge e tatu kuthwa iinakugwanithwa, inatu etha po okulongela Jehova. Dhimbulukwa kutya Jehova oku na aluhe ehalo oku tu dhimina po. (Eps. 103:8, 9) Nonando ohatu ningi omapuko, Jehova ota vulu oku tu pa oonkondo tu longe ehalo lye, ngaashi owala Simson. w23.09 6 ¶15-16

Jehova oha kala e ku hokwa, uuna to idhidhimike. Shino itashi ti nduno kutya Jehova oha kala a panda uuna to makelwa nenge wu li momaudhigu. Kalunga ongoye a hokwa. Uuna to idhidhimike oto mu nyanyudha. Onkee ano eidhidhimiko oli li lela eyambeko ekumithi. (Eps. 5:12) Dhimbulukwa kutya Abraham okwa li a idhidhimikile omamakelo, na Kalunga okwa li e mu hokwa. Kalunga okwe mu ithana kutya oku li kuume ke nomuyuuki. (Gen. 15:6; Rom. 4:13, 22) Oshinima shono natse otashi vulu oku tu ningilwa. Kalunga iha kala e tu hokwa omolwuuwindji wiilonga mbyoka hatu mu longele, nenge molwuuthembahenda wiilonga mbyoka tu na. Oha kala e tu hokwa uuna tu li aadhiginini kuye, nonando otatu hepekwa. Kutya nduno otu na uunkulungu wuni, omimvo ngapi, notu li monkalo ya tya ngiini, atuheni otatu vulu okwiidhidhimika. Mbela owu li omudhiginini kuJehova ngashingeyi, nonando oto idhidhimikile eshongo lyontumba? Ngele osho, dhimbulukwa kutya oto nyanyudha Jehova. Uuna tu shi oshinima shono, otashi vulu okukala enwethomo ewanawa kutse. Otashi vulu okukoleka etegameno lyetu. w23.12 11 ¶13-14

Omulumentu Omukriste oku na okwiilonga okukala e shi okupopya nawa naantu. Opo e shi ninge nawa, oku na okukala ha pulakene kuyalwe nokuuva ko omadhiladhilo nomaiyuvo gawo. (Omayel. 20:5) Oha vulu okumona kutya omuntu oku uvite ngiini mokupulakena komutono gwewi lye, komainyengo ge gokoshipala nosho wo keholokopo lye. Iinima mbyoka ito ke yi tseya ngele iho kala ethimbo naantu. Ngele oho popi naantu olundji to longitha iikwaelektronika, ngaashi o-email nokutuma omatumwalaka nongodhi, otayi vulu oku ku ningitha wu kale ihoo popi iinima yi uvitike nawa, ngele wu li naantu oshipala noshipala. Onkee ano kala ho kongo oompito wu popye nayalwe wu li puyo. (2 Joh. 12) Omulumentu ngoka a koka pambepo, oku na okukala e shi okwiiyambidhidha mwene nosho wo aanegumbo lye. (1 Tim. 5:8) Oshi li nawa wu ilonge uunkulungu mboka tawu vulu oku ku kwathela wu mone iilonga. (Iil. 18:2, 3; 20:34; Ef. 4:28) Kala wu shiwike wu li omuntu ngoka ha longo nuudhiginini noha longo oshilonga she sigo sha pu. Ngele osho ho ningi ngawo, otashi vulika wu ka mone iilonga nuupu noku yi kaleka po. w23.12 27 ¶12-13

Uuna Ombiimbeli tayi popi “esiku lyOmuwa,” otayi ulike kethimbo ndyoka Jehova ta ka pangula aatondi ye, nokuhupitha oshigwana she. Omathimbo gamwe monakuziwa, Jehova okwa li a geele iigwana yimwe. (Jes. 13:1, 6; Hes. 13:5; Sef. 1:8) Pethimbo lyetu, “esiku lyOmuwa” otali ka tameka nehanagulo lyaBabilon Oshinene, e tali hulu niita yaArmagedon. Opo tu ka hupe ‘mesiku’ ndyoka, otwa pumbwa okwiilongekidha ngashingeyi. Jesus okwe tu longa kutya katu na owala okwiilongekidhila “uudhigu uunene,” ihe otu na wo okutsikila ‘okukala twi ilongekidha.’ (Mat. 24:21; Luk. 12:40) Montumwafo ye yotango ndjoka a nyolele Aatessalonika, omuyapostoli Paulus okwa longitha omathaneko gontumba, opo a kwathele Aakriste ya kale yi ilongekidhila esiku enene lyaJehova lyepangulo. Paulus okwa li e shi kutya esiku lyaJehova kalya li tali ke ya pethimbo ndyoka. (2 Tes. 2:1-3) Nonando ongawo, okwa li a ladhipike aamwahe yi ilongekidhile esiku ndyoka, lya fa ando tali ya mesiku tali landula. Natse otu na okutula miilonga omayele ngoka. w23.06 8 ¶1-2

Momumvo 1978, moshilando shaTokyo, moJapani, omwa li mwa tungwa etungo eleeleka. Aantu oya li tayi ipula ngele otali ka hupa ngaa, molwaashoka moshilando moka ohamu ningwa omakakamo gevi ogendji. Ooindjiniya odha li dha ningi po shike shoka sha kwathele etungo ndyoka li hupe kekakamo lyevi moshilando shoka? Odha li dha nduluka po etungo ndyoka lya kola lela noiha li vulu wo okukakamithwa komakuthikuthi gekakamo lyevi. Aakriste oya fa etungo ndyoka. Ngiini mbela? Omukriste oku na okukala e na ondjele ngele tashi ya pokukala a kolelela noiha tengauka. Oku na okukala a kola noiha tengauka, uuna tashi ya pokuvulika koompango nokomithikampango dhaJehova. Oha “vulika nehalo ewanawa” noiha iyethele mokuyona. Shimwe ishewe, oku na okukala e na “ondjele” nenge ha tifuka, uuna tashi wapa nenge sha pumbiwa. (Jak. 3:17, NW) Omukriste ngoka a ilonga okukala e na etaloko ndika li li pandjele, iha thininikile yalwe shoka a hala shi ningwe. w23.07 14 ¶1-2

Jesus okwa li a kondjitha omamakelo gaSatana Ondiyapoli, mwa kwatelwa omaponokelo ge mu ukilila ge na ko nasha nuudhiginini we kuKalunga. (Mat. 4:1-11) Satana okwa li a tokola okuyonitha Jesus, opo a kale itaa wapa okugandja ekuliloyambo. Pethimbo lyiilonga ye yokuuvitha kombanda yevi, Jesus okwa li natango a idhidhimikile omamakelo galwe. Okwa li a hepekwa nokwa ningilwa omatilitho kutya ota dhipagwa. (Luk. 4:28, 29; 13:31) Okwa li e na okuungaunga nokwaagwanenena kwaalanduli ye. (Mark. 9:33, 34) Sho a li ta pangulwa, okwa li a hepekwa nokushekwa. Opo nduno okwa dhipagwa a fa omukolokoshi nokwa si eso enyanyalithi. (Heb. 12:1-3) Okwa li e na okwiidhidhimikila emakelo lyahugunina, nopwaahe na okugamenwa kuJehova. (Mat. 27:46) Osha yela kutya Jesus okwa hepekwa noonkondo, opo a gandje ekuliloyambo. Uuna tatu dhiladhila kunkene a iyamba nehalo a se omolwetu, mbela ihashi tu inyengitha tu kale tu mu hole nohole ya tsa kesipa? w24.01 10-11 ¶7-9

Eidhidhimiko ohali tu kwathele ngele tatu ungaunga nayalwe. Ohali tu kwathele tu pulakene neitulomo uuna yalwe taya popi. (Jak. 1:19) Ohali humitha wo komeho ombili. Ngele otu li aaidhidhimiki, uuna twa gwililwa po itatu ka popya oshinima shoka tashi vulu okuyemateka gulwe. Itatu ka geya mbala uuna gumwe a popya oshinima shoka tashi vulu oku tu ehameka. Pehala lyoku mu shunithila uuwinayi, otatu ka tsikila oku mu ‘dhimina po.’ (Kol. 3:12, 13) Eidhidhimiko ohali tu kwathele wo tu ninge omatokolo gopandunge. Pehala lyokuninga omatokolo meendelelo nopwaa na okudhiladhila, otatu ka konga ethimbo tu ninge omapekapeko notu talulule shoka tashi opalele. Pashiholelwa, ngele otatu kongo iilonga, otashi vulika tu kale tu na egamo lyokutaamba ko iilonga mbyoka tatu mono tango. Ihe ngele otu na eidhidhimiko, otatu ka kutha ethimbo tu tale kutya iilonga mbyoka otayi ka guma ngiini yaandjetu nosho wo ekwatathano lyetu naJehova. Ngele otu li aaidhidhimiki, otatu vulu okuyanda okuninga omatokolo inaaga dhiladhilwa nawa. w23.08 22 ¶8-9

Ngele owu uvite wa teka omukumo, molwaashoka owu na okukondjitha omahalo ga puka, okudhiladhila keuvaneko ndyoka wa uvanekela Jehova, sho we mu iyapulila, otaku ka nkondopaleka etokolotoko lyoye lyokukondjitha omamakelo. Ngiini mbela? Uuna wa iyapulile Jehova, oho ihupula ngoye mwene. Shono osha hala okutya ito ka gwanitha po omahalo nomalalakano gopaumwene, ngoka Jehova inaa hokwa. (Mat. 16:24) Uuna wa taalela emakelo, ito ka pumbwa okukala to ipula kutya oshike wu na okuninga po. Owa tokola nale kutya oshike wu na okuninga, ano okukala omudhiginini kuJehova. Oto ka tsikila okukala wa tokola toko okunyanyudha Jehova. Oto ka ninga wo ngaashi Job a li a ningi. Nonando Job okwa li a taalela omashongo omadhigu, okwa li a tokola toko, a ti: “Itandi ki idhimbika uuyuuki wandje.” — Job 27:5. w24.03 9 ¶6-7

Jehova ngoka e li “Kalunga kohole,” oku li pamwe natse. (2 Kor. 13:11) Oku na ko nasha natse pauhandimwe. Otwa tompwa kutya ote tu “gamene omolwesilohenda lye.” (Eps. 32:10) Ngele otwa kala hatu tedhatedha kunkene e tu ulukila ohole, ota ka kala gwolela kutse notatu ka kala tu uvite tu li popepi lela naye. Otatu ka popya naye twa manguluka noku mu lombwela kutya otwa pumbwa ohole ye shi thike peni. Otatu vulu oku mu lombwela kombinga yaashihe shoka tatu ipula nasho, tu na einekelo kutya ote ke tu uva ko nokwa halelela oku tu kwathela. (Eps. 145: 19) Ngaashi owala hatu hedha popepi nomulilo uuna ku na uutalala, osho wo hatu hedha kuJehova omolwohole ye onene. Nonando ohole yaJehova oyi na oonkondo, oku na wo olukeno. Kala wa nyanyukwa sho Jehova e ku hole. Onkee ano ohole ye nayi tu inyengitheni atuheni tu tye: “Ondi hole Omuwa”! — Eps. 116:1. w24.01 31 ¶19-20

Jesus okwa li a ningi oshindji kaashi shi owala okulombwela aantu kutya edhina lyaKalunga oJehova. Aajuda mboka Jesus a li a longo edhina lyaKalunga oya li ye li shi nale. Ihe Jesus okwa li a tula po oshiholelwa ngele tashi ya poku “mu holola.” (Joh. 1:17, 18) Pashiholelwa, Omanyolo gOshihebeli oga popya kutya Jehova omunahenda nomunalukeno. (Eks. 34:5-7) Jesus oshili ndjoka okwe yi yelitha nawa, sho a hokolola eyele lyomumati a kanene nosho wo he. Uuna tatu lesha kombinga yahe, ngoka a mono omwana “manga a li kokule” e ta matuka e ke mu tsakaneke, te mu papatele nokwe mu dhimine po tashi zi komutima, otashi tu kwathele tu uve ko kutya Jehova omunahenda shili nomunalukeno. (Luk. 15:11-32) Jesus okwa li a kwathele yalwe ya uve ko kutya He omuntu a tya lela ngiini. w24.02 10 ¶8-9

Jehova oha talaleke nokuhekeleka mboka ya gwililwa po. Ongiini tatu vulu okuholela uukwatya waJehova wokuuvila yalwe uukwawo wanankali noku ya hekeleka? Omukalo gumwe ngoka tatu vulu oku shi ninga, omokukokeka momitima dhetu uukwatya mboka wa pambathana nokuhekeleka yakwetu. Gamwe gomomaukwatya ngoka ogeni? Oshike tashi ke tu kwathela tu kale tu na ohole ndjoka twa pumbwa, opo tu ‘kaleni hatu talalekathaneni’ esiku nesiku? (1 Tes. 4:18) Otwa pumbwa okukokeka omaukwatya ngaashi olukeno, ohole yuumwayinathana nosho wo ombili. (Kol. 3:12; 1 Pet. 3:8) Omaukwatya ngono otage ke tu kwathela ngiini? Uuna uukwawo wanankali nosho wo omaukwatya ngoka ge wu pamba tu ga na, nena otatu ka kala tu na ehalo enene lyoku ya hekeleka ngele ye li muudhigu. Jesus okwa ti kutya “okana ohaka popi shoka sha udhilila momutima. Omuntu omwaanawa oha pititha mo iinima iiwanawa mompungulilo ye yiinima iiwanawa.” (Mat. 12:34, 35) Okuhekeleka aamwatate naamwameme oku li omukalo gwa simana moka hatu ya ulukile kutya otu ya hole. w23.11 10 ¶10-11

Otwa pumbwa okupula ekwatho ngele otwa hala okuuva ko omahunganeko gOmbiimbeli. Natu taleni kethaneko tali landula. Natu tye andola owa ka talela po kehala hoka kuu shi, ihe kuume koye ngoka wu li naye kehala hoka oku shi ko nawa. Oku shi mpoka mu li, noondjila adhihe oku dhi shi nawa. Kapu na omalimbililo kutya oto ka kala wa nyanyukwa sho kuume koye a zimine mu ye naye. Sha faathana, Jehova oku shi mpoka tu li momukokomoko gwethimbo ndika, noku shi nawa onakuyiwa yetu. Ano opo tu uve ko omahunganeko gOmbiimbeli, otu na okupula kuJehova ekwatho neifupipiko. (Dan. 2:28; 2 Pet. 1:19, 20) Ngaashi owala aavali haya kala ya halela oyana uuwanawa, Jehova naye okwa hala oyana ya kale nonakuyiwa ombwanawa. (Jer. 29:11) Nonando aavali ihaya vulu okutseya onakuyiwa yoyana, Jehova oha kala e shi shoka tashi ka ningwa komeho, nohashi ningwa shili. Okwa nyolitha omahunganeko mOohapu dhe, opo tu tseye kombinga yiiningwanima mbyoka ya simana manga inaayi ningwa. — Jes. 46:10. w23.08 8 ¶3-4