Ulika kutya owa pandula shoka Jehova naJesus ye ku ningila

Oho kala wu uvite ngiini uuna kuume koye e ku pe omagano omawanawa? Osha yela kutya oho kala wa nyanyukwa noonkondo, noho kala wa hala oku mu ulukila kutya owa pandula omagano ngoka. Jehova naJesus oye tu pa omagano dhingi ngoka itaatu vulu okupewa nando okomuntu gulwe. Omagano ngoka ogeni, nongiini tatu vulu okuulika kutya otwe ga pandula?

1. Omomukalo gumwe guni tatu vulu okuulika kutya otwa pandula shoka Kalunga naKristus ye tu ningila?

Ombiimbeli oyu uvaneka kutya ‘shaa ngoka i itaala muJesus,’ ota ka vula okukala nomwenyo sigo aluhe. (Johannes 3:16) Ongiini tatu vulu oku shi ninga? Otwa pumbwa okuulika eitaalo momatokolo getu nomiinima mbyoka hatu ningi. (Jakob 2:17) Uuna tatu ulike eitaalo mwaashono hatu ningi nohatu popi, ohatu koleke ekwatathano lyetu naJesus nosho wo naHe, Jehova. — Lesha Johannes 14:21.

2. Oshiningwanima shini shi ikalekelwa hashi tu kwathele tu ulike kutya otwa pandula shoka Jehova naJesus ye tu ningila?

Ongulohi ndjoka manga Jesus inaa sa, okwa li a lombwele aalanduli ye kombinga yomukalo gumwe moka taya vulu okuulika kutya oya pandula eyambo lye. Okwe ya lombwele ya kale haya gongala pamwe omolwoshiningwanima shi ikalekelwa shoka Ombiimbeli tayi ithana “Uulalelo wOmuwa” nosha tseyika wo shi li Edhimbuluko lyeso lyaKristus. (1 Aakorinto 11:20) Uulalelo mboka Jesus okwe wu dhike po, opo aayapostoli ye nAakriste ayehe mboka ya li taye ke ya konima yawo, ya kale haya dhimbulukwa kutya Jesus okwa gandja omwenyo gwe omolwetu. Jesus okwa gandja elombwelo ndika a ti: “Shi ningeni nokudhimbulukwa ndje.” (Lukas 22:19) Ngele oho kala pEdhimbuluko, oho ulike kutya owa pandula Jehova naJesus sho ye tu hole unene.

ILONGA OSHINDJI

3. Olupandu ohalu tu inyengitha tu katuke onkatu

Dhiladhila ando komuntu gumwe e ku hupitha kuu se omeya. Oto ka dhimbwa ngaa shoka omuntu ngoka e ku ningila? Nenge oto ka tala nkene to vulu oku mu pandula omolwoshinima shoka e ku ningila?

Omolwesilohenda lyaJehova, otu na ompito yoku ka mona omwenyo gwaaluhe. Lesha 1 Johannes 4:8-10, e tamu kundathana omapulo taga landula:

• Omolwashike eyambo lyaJesus li li omagano gi ikalekelwa?

• Owu uvite ngiini kombinga yaashoka Jehova naJesus ye ku ningila?

Ongiini tatu vulu okuulika kutya otwa pandula shoka Jehova naJesus ye tu ningila? Lesha 2 Aakorinto 5:15 nosho wo 1 Johannes 4:11; 5:3. Konima ngele mwa lesha enyolo kehe, kundathaneni epulo tali landula:

• Shi ikolelela kenyolo ndika, oshike tatu vulu okuninga tu ulike kutya otwa pandula Jehova naJesus?

4. Holela Jesus

Omukalo gulwe moka tatu vulu okuulika olupandu, omokuholela Jesus. Lesha 1 Petrus 2:21, e tamu kundathana epulo tali landula:

• Omomikalo dhini to vulu okuholela Jesus?

5. Kala ho kala pEdhimbuluko lyeso lyaKristus

Opo wu mone shoka sha li sha ningwa po pUulalelo wOmuwa wotango, lesha Lukas 22:14, 19, 20, e tamu kundathana omapulo taga landula:

• Oshike sha li sha ningwa pUulalelo wOmuwa?

• Oshikwiila nomaviinu otayi thaneke shike? — Tala ovelise 19 nosho wo 20.

Jesus okwa li a hala aalongwa ye ya kale haya dhimbulukwa Uulalelo wOmuwa lumwe momumvo, mesiku ndyoka a sile. Onkee Oonzapo dhaJehova ohadhi gongala pamwe, lumwe momumvo dhi dhimbulukwe eso lyaKristus momukalo moka e ya lombwela ye shi ninge. Opo wu uve kombinga yokugongala hoka kwa simana, dhana OKAVIDIO, e tamu kundathana epulo tali landula.

OKAVIDIO: Edhimbuluko lyeso lyaJesus (1:41)

• Oshike hashi ningwa pEdhimbuluko?

Oshikwiila nomaviinu oyi na shoka tayi thaneke. Oshikwiila otashi thaneke olutu lwaJesus lwopantu lwa gwanenena ndoka a yamba po omolwetu. Omaviinu otaga thaneke ombinzi ye

OWI ILONGO SHIKE?

Ohatu ulike olupandu lwaashoka Jesus e tu ningila, mokuulika kutya otwi itaala muye nokukala hatu kala pEdhimbuluko lyeso lye.

Omapulo geendululo

• Otashi ti shike okukala tu na eitaalo muJesus?

• Oto ka ulika ngiini kutya owa pandula shoka Jehova naJesus ye ku ningila?

• Omolwashike sha simana noonkondo okukala pEdhimbuluko lyeso lyaKristus?

UUYELELE WA GWEDHWA PO

Eso lyaKristus ohali tu inyengitha tu ninge shike?

Okwa longitha olutu lwe a simaneke Jehova (9:28)

Ilonga oshindji kombinga yeitaalo nankene tatu vulu oku li ulika.

“Ulika kutya owi itaala momauvaneko gaJehova” (Oshungolangelo, Kotoba 2016)

Lesha wu uve nkene onkalamwenyo yomukiintu gumwe ya hwepopala, sho i ilongo kutya eyambo lyaKristus otali ti shike kuye.

“Ombiimbeli ohayi lundulula onkalamwenyo yaantu” (Oshungolangelo, 1 Auguste 2011)

Tala kutya omolwashike aantu owala aashona oyo haya li nokunwa pEdhimbuluko.

“Omolwashike Oonzapo dhaJehova hadhi dhimbulukwa Uulalelo wOmuwa momukalo gwa yooloka ko komalongelokalunga galwe?” (Oshitopolwa shi li kepandja lyetu lyokointaneta)