7. Uukwaniilwa waKalunga owo owala wu na oompango dha dhenga mbanda

Aapangeli yopantu ohaya toto po oompango ndhoka ye wete kutya otadhi gamene notadhi etele aakwashigwana yawo uuwanawa. Uukwaniilwa waKalunga nawo owu na oompango ndhoka aakwashigwana yawo ye na okulandula. Lesha 1 Aakorinto 6:9-11, e tamu kundathana omapulo taga landula:

• Sho to tala, uuyuni otawu ka kala wa tya ngiini ngele kehe gumwe oha vulika koompango dhaKalunga?a

• Mbela sho to tala, Jehova oku na ngaa uuthemba wokukala a tegelela aapangelwa yUukwaniilwa we ya vulike koompango ndhika? Omolwashike to tile ngawo?

• Oshike tashi ulike kutya aantu mboka ihaaya vulika koompango ndhika otaya vulu okulunduluka? — Tala ovelise 11.

Aantu oyendji ihaya kala ya manguluka okupopya kombinga yomilalo. Ihe Ombiimbeli oya popya kombinga yadho, noye dhi popya momukalo gwesimaneko. Shoka ya popya otashi tu etele uuwanawa noshi li lela mondjila, oshoka oya za kuJehova ngoka oye Omushiti gwetu. Onkene oku shi shoka tashi tu opalele. Ohe tu lombwele shoka tu na okuninga, opo tu mu nyanyudhe, naashoka tashi vulu oku tu kwathela, tu nyanyukilwe onkalamwenyo sigo aluhe.

1. Jehova okwa tala ko ngiini omilalo?

Omilalo omagano ga za kuJehova. Okwa hala dhi kale pokati komulumentu nomukiintu, mboka ya hokana. Omagano ngaka ihaga kwathele owala aaihokani ya mone aanona, ihe oyu ulukilathane wo ohole momukalo gwopaunshitwe notagu ya uvitha nawa. Onkee ano, Oohapu dhaKalunga otadhi ti: “Nyanyukilwa omukulukadhi gwoye wa za naye kuufuko.” (Omayeletumbulo 5:18, 19) Jehova okwa tegelela aaihokani Aakriste ya kale aadhiginini kookuume kawo kopandjokana, opo kaaya ye moluhondelo. — Lesha Aahebeli 13:4.

2. Omilalo dha nyata oshike?

Ombiimbeli otayi ti kutya ‘aantu mboka aaholume itaya ka ya mOshilongo shaKalunga.’ (1 Aakorinto 6:9, 10) Aanyoli yOmbiimbeli oya longitha oshitya shOshigreka porneia, ya yelithe kutya uuholume nenge omilalo dha nyata oshike. Oshitya shoka osha kwatela mo (1) omilaloa pokati kaantu inaaya hokana, (2) uushenge nosho wo (3) okuya momilalo noshinamwenyo. Ohatu nyanyudha Jehova nohashi tu etele uuwanawa, ngele tatu ‘yanda oluhondelo.’ — 1 Aatessalonika 4:3.

ILONGA OSHINDJI

3. Yanda omilalo dha nyata

Omulumentu gumwe omudhiginini gwedhina Josef, okwa li a tindi okuya momilalo dha nyata. Lesha Genesis 39:1-12, e tamu kundathana omapulo taga landula:

• Oshike shi inyengitha Josef a ye ondapo? — Tala ovelise 9.

• Sho to tala, mbela Josef okwa ninga ngaa etokolo li li mondjila? Omolwashike to tile ngawo?

OKAVIDIO: Yanda oluhondelo (5:06)

Jehova okwa hala atuhe tu yande omilalo dha nyata. Lesha 1 Aakorinto 6:18, e tamu kundathana omapulo taga landula:

• Oonkalo dhini tadhi vulu okuningitha omuntu a ye momilalo dha nyata?

• Ongiini to vulu okuyanda omilalo dha nyata?

4. Oto vulu okusinda omamakelo

OKAVIDIO: Kondjitha emakelo mokukala ho lesha Ombiimbeli (3:02)

• Omumwatate okwa ningi po shike, sho a dhimbulula kutya omadhiladhilo ge noonkatu dhe otadhi vulu oku mu ningitha a kale kee shi omudhiginini komukulukadhi gwe?

Omathimbo gamwe Aakriste aadhiginini nayo ohaya kondjo nokukaleka omadhiladhilo gawo ga yogoka. Ongiini to vulu okuyanda okudhiladhila kombinga yiinima ya nyata? Lesha Aafilippi 4:8, e tamu kundathana omapulo taga landula:

• Iinima yini tu na okukala hatu dhiladhila kuyo?

• Okulesha Ombiimbeli nokukala aluhe twi ipyakidhila niilonga yaJehova, ohaku tu kwathele ngiini tu yande okuyona?

5. Omithikampango dhaJehova ohadhi tu etele uuwanawa

OKAVIDIO: Omulumentu kee na oondunge (9:31)

• Omulumentu omugundjuka okwi ifala ngiini memakelo? — Tala Omayeletumbulo 7:8, 9.

• Ngaashi sha popiwa mOmayeletumbulo 7:23, 26, omilalo dha nyata ohadhi vulu okweeta iizemo iiwinayi noonkondo. Ngele ihatu yi momilalo dha nyata, uupyakadhi wuni tatu vulu okuyanda?

• Okuyanda omikalo dha nyata otaku vulu ngiini oku tu kwathela tu kale nonkalamwenyo ombwanawa sigo aluhe?

Aantu yamwe ohaya dhiladhila kutya shoka Ombiimbeli tayi ti kombinga yuushenge kashi li pahole. Ihe Jehova, Kalunga omunahole, okwa hala aantu ayehe ya kale nonkalamwenyo ombwanawa sigo aluhe. Opo tu kale nonkalamwenyo yi li ngawo, otu na okuvulika komithikampango dhe. Lesha 1 Aakorinto 6:9-11, e tamu kundathana epulo tali landula:

• Pataloko lyaKalunga, mbela uushenge owo owala wa puka?

Opo tu nyanyudhe Kalunga, atuheni otwa pumbwa okuninga omalunduluko. Mbela osha simana ngaa? Lesha Episalomi 19:8, 11, e tamu kundathana omapulo taga landula:

• Sho to tala, mbela omithikampango ndhoka Jehova a tula dhi na ko nasha nokuyanda omikalo dha nyata, odhi li ngaa pandjele? Omolwashike to tile ngawo?

OWI ILONGO SHIKE?

Omilalo omagano ga za kuJehova, nodhi na owala okukala pokati komulumentu nomukiintu mboka ya hokana.

Omapulo geendululo

• Omilalo dha nyata odha kwatela mo shike?

• Oshike tashi tu kwathele tu yande omilalo dha nyata?

• Uuwanawa wuni hatu mono, uuna tatu landula omithikampango dhaJehova dhi na ko nasha nokuyanda omikalo dha nyata?

UUYELELE WA GWEDHWA PO

Ilonga kutya omolwashike Kalunga a hala omulumentu nomukiintu mboka ya hala okukala pamwe, ya hokane.

“Ombiimbeli otayi ti ngiini kombinga yokwootekathana?” (Oshitopolwa shi li kepandja lyetu lyokointaneta)

Ilonga kutya omolwashike Ombiimbeli tayi ti kutya uushenge owa puka, ihe shoka itashi ti kutya otu na okutonda omashenge.

“Mbela uushenge owa puka?” (Oshitopolwa shi li kepandja lyetu lyokointaneta)

Tala nkene oompango dhaKalunga dhi na ko nasha nomilalo hadhi tu gamene.

“Mbela okuthipathana kiilyo yoluvalo nako omilalo?” (Oshitopolwa shi li kepandja lyetu lyokointaneta)

Lesha oshimoniwa: “Oya ungaunga nangame nesimaneko,” wu uve shoka shi inyengitha gumwe a ethe po uushenge, opo a hokiwe kuKalunga.

“Ombiimbeli ohayi lundulula onkalamwenyo yaantu” (Oshungolangelo, 1 Apilili 2011)

Aantu muuyuni awuhe oye na omataloko ga yoolokathana kombinga yomalovu. Yamwe oye hole okunwa nookuume kawo omathimbo gamwe. Yamwe ohaya tokola kaaga ende mo nando mokana kawo. Omanga yamwe haya nu, e taya kolwa. Ihe mbela Ombiimbeli otayi ti ngiini kombinga yomalovu?

1. Mbela osha puka okunwa omalovu?

Ombiimbeli inayi indika okunwa omalovu. Oya popya owala iinima oyindji iiwanawa mbyoka Kalunga e tu pa, mwa kwatelwa ‘omaviinu ngoka haga nyanyudha omuntu.’ (Episalomi 104:14, 15) Shimwe ishewe, mOmbiimbeli omwa popiwa aalumentu naakiintu yamwe aadhiginini mboka nayo ya li haya nu omalovu. — 1 Timoteus 5:23.

2. Ombiimbeli oya gandja omayele geni kwaamboka haya nu omalovu?

Jehova okwi indika okunwa sha pitilila nosho wo uunkolwe. (Aagalati 5:21) Oohapu dhe otadhi ti: “Ino kala mokati kaanwi yomaviinu.” (Omayeletumbulo 23:20) Onkee ngele otwa tokola okunwa omalovu, kutya nduno otu li nayalwe nenge otu li otse atuke, inatu ipa mo unene e tatu kala itaatu vulu okudhiladhila nawa, okupopya oohapu dha yogoka nokwiihumbata nawa. Shimwe ishewe, katu na oku ga nwa sigo taga yono po uukolele wetu. Ngele ihatu vulu okupangela okunwa kwetu, oshihwepo tu ku ethe po thiluthilu.

3. Ongiini tatu vulu okusimaneka omatokolo gayalwe ge na ko nasha nokunwa omalovu?

Kehe gumwe oku na okutokola ngele ota nu omalovu nenge hasho. Inatu pangula omuntu ngoka a tokola okunwa omalovu pandjele noinatu thiminika omuntu ngoka a tokola kee ga nwe nandonando. (Aaroma 14:10) Ngele okunwa kwetu omalovu otaku pundukitha yalwe, onawa tu ku ethe po. (Lesha Aaroma 14:21.) Ihatu longo owala ‘shoka she tu opalela, ihe ooshoka tashi opalele wo yakwetu.’ — Lesha 1 Aakorinto 10:23, 24.

ILONGA OSHINDJI

4. Tokola ngele oto nu omalovu nenge hasho

Jesus okwa li a tala ko ngiini okunwa omalovu? Opo tu mone eyamukulo, natu tale koshikumithalonga she shotango. Lesha Johannes 2:1-11, e tamu kundathana omapulo taga landula:

• Oshike tatu vulu okwiilonga moshikumithalonga shika kombinga yetaloko lyaJesus li na ko nasha nomalovu nosho wo kombinga yaamboka haye ga nu?

• Molwaashoka Jesus ka li i indike okunwa omalovu, ongiini Omukriste e na okutala ko ngoka he ga nu?

Omukriste nonando okwa manguluka okunwa omalovu, shika itashi ti kutya oshi li aluhe pandunge oku shi ninga. Lesha Omayeletumbulo 22:3, e to tala nkene iinima tayi landula, tayi vulu oku ku kwathela wu tokole ngele oto nu nenge hasho:

• Uuna to ka hinga nenge to ka longa neshina lyontumba.

• Uuna wu li metegelelo.

• Uuna ndohotola e ku lombwele kuu nwe omalovu.

• Uuna ho nyengwa okuyeleka kutya nwa shi thike peni.

• Uuna ompango yomoshilongo inaayi pitika wu nwe omalovu.

• Uuna wu li nomuntu ngoka ihaa nu omalovu, molwaashoka a li e na uupyakadhi wokunwa sha pitilila monakuziwa.

Mbela owu na okupa aantu omalovu pohango nenge piituthi yilwe? Opo wu mone shoka tashi vulu oku ku kwathela kutya ninga po shike, dhana OKAVIDIO.

OKAVIDIO: Mbela nandi pe aantu omalovu? (2:41)

Lesha Aaroma 13:13 nosho wo 1 Aakorinto 10:31, 32. Konima ngele mwa lesha enyolo kehe, kundathaneni epulo tali landula:

• Ongiini okutula miilonga ekotampango ndika taku vulu oku ku kwathela wu ninge etokolo ndyoka tali nyanyudha Jehova?

5. Yeleka kutya oto nu shi thike peni

Ngele owa tokola wu nwe omalovu, kaleka oshinima shika momadhiladhilo: Jehova ina indika okunwa omalovu, ihe okunwa sha pitilila. Omolwashike mbela? Lesha Hosea 4:11, 18, e tamu kundathana epulo tali landula:

• Oshike tashi vulu okuningwa po, ngele omuntu oha nu sha pitilila?

Ongiini tatu vulu okuyanda okunwa sha pitilila? Otwa pumbwa okukala tu na ondjele nenge tu shi omangambeko getu. Lesha Omayeletumbulo 11:2, e tamu kundathana epulo tali landula:

• Omolwashike shi li pandunge okwiitulila po ongamba, ngele tashi ya pokunwa omalovu?

6. Shoka tashi vulu okukwathela omuntu a ethe po okunwa sha pitilila

OKAVIDIO: ‘Onda li nda kenyanana iikala yandje’ (6:32)

• Mokavidio hano, Dmitry okwa li hi ihumbata ngiini uuna a nwa omalovu?

• Mbela okwa li a vulu oku ga etha po nziya?

• Oshike she mu kwathele a ethe po okunwa omalovu sha pitilila?

Lesha 1 Aakorinto 6:10, 11, e tamu kundathana omapulo taga landula:

• Uunkolwe owa nika oshiponga shi thike peni?

• Oshike tashi ulike kutya omuntu ngoka ha nu omalovu sha pitilila, ota vulu okulunduluka?

Lesha Mateus 5:30, e tamu kundathana epulo tali landula:

• Ethaneko lyokuteta ko oshikaha otali ulike kutya otu na okweetha po oshinima shontumba, opo tu nyanyudhe Jehova. Oshike to vulu okuninga ngele oto nyengwa okweetha po okunwa omalovu sha pitilila?a

Lesha 1 Aakorinto 15:33, e tamu kundathana epulo tali landula:

• Oshike tashi vulu oku ku ningilwa, ngele oho endathana nookuume mboka haya nu sha pitilila?

OWI ILONGO SHIKE?

Jehova okwe tu pa omalovu, opo tu inyanyudhe, ihe okwi indika okunwa sha pitilila nosho wo uunkolwe.

Omapulo geendululo

• Ombiimbeli otayi ti ngiini kombinga yomalovu?

• Okunwa sha pitilila ohaku eta iizemo yini?

• Ongiini tatu vulu okusimaneka omatokolo gayalwe ngoka haya ningi shi na ko nasha nokunwa omalovu?

UUYELELE WA GWEDHWA PO

Ongiini aagundjuka yomimvo omulongo nasha taya vulu okuninga omatokolo gopandunge ge na ko nasha nomalovu?

Iikolitha oyi na iilanduliko (2:31)

Tala koonkatu ndhoka to vulu okukatuka, opo wu vule okweetha po okunwa sha pitilila.

“Kala netaloko lyu uka kombinga yiikolitha” (Oshungolangelo, 1 Januali 2010)

Mbela Omukriste oku na okukutha ombinga mokudhenga uuhalasa kumwe?

“Omapulo ga za kaaleshi” (Oshungolangelo, 15 Febuluali 2007)

Lesha ehokololo, “Onda li handi kwata iitenga,” wu uve nkene gumwe a etha po okunwa sha pitilila.

“Ombiimbeli ohayi lundulula onkalamwenyo yaantu” (Oshungolangelo, 1 Mei 2012)

Nonando owu hole Jehova noonkondo noho ningi oonkambadhala wu vulike kuye, omathimbo nomathimbo otashi vulika wu mu yemateke. Ihe nando ongawo, omayono gamwe oga kwata miiti unene. (1 Aakorinto 6:9, 10) Ngele owa yono eyono lya kwata miiti, dhimbulukwa kutya Jehova oku ku hole natango, oku na ehalo lyoku ku dhimina po noku ku kwathela.

1. Oshike tu na okuninga, opo Jehova e tu dhimine po?

Mboka ye hole Jehova ohaya kala ya yemata uuna ya mono kutya oya yona eyono lya kwata miiti. Ihe Jehova ohe ya hekeleke neuvaneko ndyoka a uvanekela oshigwana she, tali ti: “Oondjo dheni nando nadhi kale dha tiligana mbyumbyumbyumbyu, otadhi ka toka dha fa oompawe.” (Jesaja 1:18) Jehova ote ke tu dhimina po thiluthilu ngele otwi iyele ombedhi shili. Ohatu ulike ngiini kutya otwi iyela ombedhi? Omokukala tu uvite nayi omolwomayono getu, e tatu etha po okulonga shoka oshiwinayi nokupula Jehova e tu dhimine po. Opo ihe ohatu ningi oonkambadhala tu lundulule okudhiladhila kwetu nenge tu ethe po omikalondjigilile ndhoka dhe tu yonitha. Otu na wo okuninga ngaashi tatu vulu, tu vulike komithikampango dhe dhi li pauyuuki. — Lesha Jesaja 55:6, 7.

2. Jehova oha longitha ngiini aakuluntugongalo ye tu kwathele uuna twa yona?

Ngele otwa yono eyono lya kwata miiti, Jehova okwe tu lombwela tu “ithane aakuluntu yegongalo.” (Lesha Jakob 5:14, 15.) Aalumentu mboka ya langekwa po oye hole Jehova nosho wo oonzi dhe. Oya dheulwa nkene ye na oku tu kwathela, opo tu kale ishewe tu na ekwatathano ewanawa naJehova. — Aagalati 6:1.

Aakuluntugongalo ohaye tu kwathele ngiini ngele otwa yono eyono lya kwata miiti? Aakuluntugongalo yaali nenge yatatu otaye ke tu pukulula, taya longitha Ombiimbeli. Otaye ke tu pa wo omaetopo nomayele ge tu kwathele kaatu endulule we eyono ndyoka. Aakuluntugongalo ohaya kutha mo megongalo omuntu ngoka a yona eyono lya kwata miiti, ihe ini iyela ombedhi, opo kaa nwethe mo yalwe.

ILONGA OSHINDJI

3. Okuhempulula omayono getu ohaku tu kwathele tu kale ishewe ookuume kaJehova

Epuko kehe tatu ningi ohali yemateke Jehova, onkene otu na okwiihokolola kuye. Lesha Episalomi 32:1-5, e tamu kundathana epulo tali landula:

• Omolwashike sha simana okuhempulula omayono getu kuJehova, pehala lyokukambadhala oku ga holeka?

OKAVIDIO: ‘Omuwa oha geele kehe ngoka e hole’ (3:01)

• Ngaashi twa mono mokavidio, aakuluntugongalo oya li ya kwathele ngiini Canon a galukile kuJehova?

Otu na okukala twa mangulukila aakuluntugongalo noku ya lombwela oshili, oshoka oye lile po oku tu kwathela. Lesha Jakob 5:16, e tamu kundathana epulo tali landula:

• Omolwashike hashi kala oshipu kaakuluntugongalo oku tu kwathela, ngele otwe ya lombwele oshili?

4. Jehova oha ulukile ohenda mboka ya yona

Ngele omuntu, ngoka a yona eyono lya kwata miiti, okwa tindi okuvulika komithikampango dhaJehova, oha kuthwa mo megongalo, noihatu kala we tatu endathana naye nenge tatu nyanyukilwa pamwe. Lesha 1 Aakorinto 5:6, 11 e tamu kundathana epulo tali landula:

• Ngaashi owala efulika hali tumbike ondombo yoomboloto, ongiini okweendathana nomuntu ngoka ini iyela ombedhi haku nwetha mo egongalo?

Ongiini omukalo moka Jehova ha ungaunga naayoni tagu ulike kutya oku na ondjele, ohenda nomunahole?

5. Jehova ohe tu dhimine po uuna twi iyela ombedhi

Jesus okwa li a longitha ethaneko ndyoka tali tu kwathele tu uve ko kutya Jehova oha kala e uvite ngiini, ngele omuntu okwi iyele ombedhi. Lesha Lukas 15:1-7, e tamu kundathana epulo tali landula:

• Ethaneko ndyoka otali tu longo shike kombinga yaJehova?

Lesha Hesekiel 33:11, e tamu kundathana epulo tali landula:

• Oshike twa pumbwa okuninga, opo tu ulike kutya otwi iyela ombedhi shili?

OWI ILONGO SHIKE?

Ngele otwa yono eyono lya kwata miiti e tatu iyele ombedhi shili nokutokola okweetha po shoka oshiwinayi, Jehova ote ke tu dhimina po.

Omapulo geendululo

• Omolwashike sha simana okuhempululila Jehova omayono getu?

• Oshike tu na okuninga, opo tu dhiminwe po omayono getu?

• Ngele otwa yono eyono lya kwata miiti, omolwashike tu na okukonga ekwatho kaakuluntugongalo?

UUYELELE WA GWEDHWA PO

Tala nkene Jehova a ulukila omulumentu gumwe ohenda, ndjoka ya popiwa muJesaja 1:18.

Jehova omunahenda (5:02)

Aakuluntugongalo otaya vulu ngiini okukwathela mboka ya yona eyono lya kwata miiti?

“Ungaunga naayoni nohole nonohenda” (Oshungolangelo, Auguste 2024)

Tala nkene ohole nohenda ya ulukilwa aayoni mboka inaaya iyela ombedhi.

“Ekwatho kwaamboka ya kuthwa mo megongalo” (Oshungolangelo, Auguste 2024)

Lesha ehokololo, “Onda li nda pumbwa okugalukila kuJehova,” wu mone kutya omolwashike omulumentu gumwe ngoka a li a thiga po oshili, a li e uvite kutya Jehova okwe mu hilila kuye.

“Ombiimbeli ohayi lundulula onkalamwenyo yaantu” (Oshungolangelo, 1 Apilili 2012)