Aalumentu, ohamu vulika ngaa kuukwamutse waKristus?

“Kristus oye omutse gwomulumentu kehe.”—1 KOR. 11:3.

1. Oshike tashi ulike kutya Jehova ke shi Kalunga kevundakano?

“OMUWA, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!” Ehololo 4:11 osho tali ti ngaaka. Molwaashoka oye a shita iinima ayihe, Jehova Kalunga oye Omupangeli Omunene gweshito alihe noku vule eshito lye alihe. Oshi iwetikile kutya Jehova ‘ke shi Kalunga kevundakano, ihe okombili’ ngele tatu tala komukalo ngoka aayengeli yu unganekwa.—1 Kor. 14:33, OB-1954; Kol. 1:15; Jes. 6:1-3; Heb. 12:22, 23.

2, 3. (a) Olye oshishitwa shaJehova shotango? (b) Omwana oku na ondondo yini moku yi yelekanitha naandjoka yaHe?

² Manga sha shilwe inaashi shitwa, Kalunga oko a kala nale kuye mwene uule woomvula itaadhi vulu okuyalulwa. Oshishitwa she shotango osha li oshishitwa shopambepo shoka sha tseyika shi li “Ohapu,” molwaashoka okwa li Omupopiliko gwaJehova. Iinima ayihe yilwe oya shitwa okupitila mOhapu. Konima, okwa li e ya kombanda yevi e li omuntu a gwanenena nokwa li a tseyika e li Jesus Kristus.—Lesha Johannes 1:1-3, 14.

³ Omanyolo otaga ti shike shi na ko nasha nondondo yaKalunga nosho wo yOmwana omuvalwa gwotango? Mokunyola a nwethwa mo kombepo ondjapuki, omuyapostoli Paulus ote tu lombwele ta ti: “Onda hala, mu kale mwa tseya kutya Kristus oye omutse gwomulumentu kehe, omulumentu oye omutse gwomukadhi, naKalunga oye omutse gwaKristus.” (1 Kor. 11:3) Kristus oku li kohi yuukwamutse waHe. Uukwamutse nosho wo okuvulika oyo iinima ya simana noonkondo opo ombili nelandulathano yi kale mokati kiishitwa iinandunge. Nokuli naangoka ‘iinima ayihe ya shitwa okupitila muye’ okwa tegelelwa a vulike kuukwamutse waKalunga.—Kol. 1:16.

4, 5. Jesus okwa li u uvite ngiini shi na ko nasha nondondo ye moku yi yelekanitha naandjoka yaJehova?

⁴ Jesus okwa li u uvite ngiini kombinga yokuvulika kuukwamutse waJehova nokuya kombanda yevi? Omanyolo otaga ti: “Jesus Kristus . . . oye okwa li e na uukwatya waKalunga, ye ina dhiladhila nando olumwe, a kambadhale nokuhakana okukala a fa Kalunga. Ihe okwi ihula uukalunga e ta zala olupe lwomupika. Oye okwa ningi a fa omuntu nokwa holoka molupe lwomuntu. Oye okwi ifupipike nokwe ende ondjila yevuliko sigo omeso lye [lyokomuti gwomahepeko, NW].”—Fil. 2:5-8.

⁵ Ethimbo kehe, Jesus okwa vulika neifupipiko okulonga ehalo lyahe. Okwa ti: “Ongame itandi vulu okuninga nando osha mungame mwene . . . epangulo lyandje oli li mondjila. Oshoka itandi landula ehalo lyandje mwene, ihe olyaanguka a tuma ndje.” (Joh. 5:30) Okwa ti: ‘Ngame otandi longo aluhe shoka sho opalela Tate.’ (Joh. 8:29) Lwokuuka pehulilo lyonkalamwenyo ye kombanda yevi, okwa ti kuHe megalikano: “Ngame onde ku adhimitha kombanda yevi, onda tsakanitha oshilonga shoka we shi pe ndje, ndi shi longe.” (Joh. 17:4) Osha yela kutya kasha li oshidhigu kuJesus okuzimina nokutaamba uukwamutse waKalunga.

Okuvulika kuHe okwa li kwe etele Omwana uuwanawa

6. Jesus okwa li u ulike omaukwatya geni omawanawa?

⁶ Sho Jesus a li kombanda yevi, okwa li u ulike omaukwatya ogendji omawanawa. Wumwe womomaukwatya ngaka owa li ohole onene ndjoka a li e nine He. Okwa ti: “Ondi hole Tate.” (Joh. 14:31) Okwa li wo e hole aantu noonkondo. (Lesha Mateus 22:35-40.) Jesus okwa li e na olukeno nohenda, ka li e na onyanya. Okwa li a ti: “Ileni kungame amuhe mwa vulwa nomwa humbatekwa uudhigu, ongame notandi mú pe evululuko. Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko. Oshoka ondjoko yandje ombwanawa nomutenge gwandje omupu.” (Mat. 11:28-30) Aantu ayehe yoomvula adhihe mboka ya fa oonzi, unene tuu mboka ya monithwa iihuna, oya mona ehekeleko muukwatya waJesus uuwanawa nosho wo metumwalaka lye tali nyanyudha.

7, 8. Shi ikolelela kOmpango, omukiintu ngoka a li e na etiko lyombinzi okwa li a ngambekwa kaa ninge shike, ihe ongiini Jesus a li u ungaunga naye?

⁷ Natu tale kunkene Jesus a li u ungaunga naakiintu. Momukokomoko gwondjokonona, aalumentu oyendji oyu unganga nayi unene naakiintu. Shoka osho sha li ngaaka naawiliki yomalongelokalunga muIsraeli shonale. Ihe Jesus okwa li u ungaunga naakiintu nesimaneko. Shika osha li shu ulikwa sho a li u ungaunga nomukiintu ngoka a li a ala uuvu wetiko lyombinzi uule woomvula 12. “Okwa mono iihuna noonkondo” mokuya koonganga nokwa li a futu ashihe shoka a li e shi na, ihe ina kala nande nawa. Kakele koonkambadhala adhihe ndhoka, “uuvu owa geye owala.” Shi ikolelela kOmpango, okwa li a talika ko inaa yogoka. Kehe ngoka ta gumu oonguwo dhe naye wo okwa li ta kala inaa yogoka.—Lev. 15:19, 25.

⁸ Sho omukiintu u uvu kutya Jesus okwa li ta aludha aavu naye okwa li wo a yi mongundu ndjoka ya li ye mu kundukidha ta dhiladhila ta ti: “Shampa tuu tandi gumu koonguwo dhe, nena otandi aluka.” Okwa kwata Jesus nokwa aluka mbalambala. Jesus okwa li e shi shi kutya ka li e na okukwata onguwo ye. Kakele kaashono, ka li e mu ganda. Mepingathano naashoka, okwa li u ungaunga naye nolukeno. Okwa li u uvite ko nkene omukiintu a li u uvite konima yokweehama uule woomvula adhihe ndhoka, nokwa li a mono kutya okwa li a pumbwilila ekwatho. Jesus okwe mu lombwele nohenda a ti: “Mumwandje, eitaalo lyoye lye ku aludha. Inda nombili, ngu u kale wa aluka kuuvu woye.”—Mark. 5:25-34.

9. Sho aalongwa yaJesus ya li taya kambadhala okukeelela aanona kaaye ye kuye, okwa li i inyenge ngiini?

⁹ Nokuli naanona oya li haya kala yu uvite ombili ngele ye li naJesus. Oshikando shimwe sho aantu ya li ye eta aanona kuye, aalongwa ye oya li ye ya ganda, osha yela kutya oya li yu uvite kutya Jesus ka li a hala okupiyaganekwa kaanona. Ihe Jesus hasho a li u uvite ngaaka. Ehokololo lyOmbiimbeli otali tu lombwele tali ti: “Jesus sho kwe shi mono, okwa geye e ta ti [kaalongwa ye]: ‘Etheni uunona, u ye kungame. Inamu u keelela ko, oshoka Oshilongo shaKalunga oshaamboka ye u fa.’” Natango “okwe u papata momaako ge nokwe u tenteke iikaha ye e te u yambeke.” Jesus ka li owala inaa ganda aanona, ihe okwa li wo e ya taamba ko.—Mark. 10:13-16.

10. Osha li she ende ngiini opo Jesus a kale e na omaukwatya ngoka a li u ulike?

¹⁰ Osha li she ende ngiini opo Jesus a kale e na omaukwatya ngoka a li e na monkalamwenyo ye sho a li kombanda yevi? Pethimbo sho a li omuntu gwopambepo, okwa li a kala naHe gwomegulu uule woomvula odhindji nokwa kala nokwiilonga kuye. (Lesha Omayeletumbulo 8:22, 23, 30.) Sho a li megulu okwa li a mono omukalo gwaJehova gwopahole gwokulongitha uukwamutse kiishitwa ye ayihe naashoka okwa li e shi ningi okukalamwenyo kwe. Mbela ando Jesus okwa li ihaa vulika kuukwamutse waHe, mbela ando okwa vulu ngaa okuninga ngaaka? Osha li enyanyu enene kuye okuvulika kuHe, naJehova okwa li a nyanyukwa okukala e na Omwana a tya ngaaka. Jesus sho a li kombanda yevi, okwa li u ulike thiluthilu omaukwatya omakumithi ngoka He gwomegulu e na. Kashi li tuu uuthembahenda kutse tu kale hatu vulika kuKristus, Omupangeli gwUukwaniilwa womegulu ngoka a langekwa po kuKalunga!

Holela omaukwatya gaKristus

11. (a) Otu na okulonga nuudhiginini tu holele lye? (b) Omolwashike aalumentu oyo unene ye na okukambadhala ya holele Jesus?

¹¹ Aantu ayehe megongalo lyopaKriste, unene tuu aalumentu, oye na okulonga nuudhiginini ya holele omaukwatya gaKristus. Ngaashi naanaa sha popiwa metetekelo, Ombiimbeli otayi ti: “Kristus oye omutse gwomulumentu kehe.” Ngaashi Kristus a li a holele Omutse gwe, Kalunga kashili, aalumentu Aakriste oye na okukambadhala ya holele omutse gwawo, Kristus. Sho Paulus a li a ningi Omukriste, okwa li a ningi naanaa ngaaka. Okwa li a kumagidha Aakriste ooyakwawo a ti: “Holelii ndje, oshoka ngame otandi holele Kristus.” (1 Kor. 11:1) Omuyapostoli Petrus okwa popi wo a ti: “Oshinima sha tya ngeyi osho Kalunga e mú ithanene. Oshoka Kristus wo okwa hepekwa omolweni nokwe mú thigile oshiholelwa, opo mu landule ondjila ndjoka a li e yi ende.” (1 Pet. 2:21) Aalumentu oye na okugandja eitulomo kekumagidho ndyoka lyokuholela Kristus omolwetompelo lilwe natango. Oyo haya ningi aakuluntugongalo naayakuligongalo. Ngaashi naanaa Jesus a li a mono enyanyu mokuholela Jehova, aalumentu Aakriste oye na okumona enyanyu mokuholela Kristus nosho wo omaukwatya ge.

12, 13. Ongiini aakuluntugongalo ye na okuungaunga noonzi ndhoka dhi li metonatelo lyawo?

¹² Aakuluntugongalo momagongalo gopaKriste oye na oshinakugwanithwa shokwiilonga ya kale ya fa Kristus. Petrus okwa li a kumagidha aalumentu aakokele nenge aakuluntugongalo a ti: “Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko. Inamu longa nelalakano tali sitha ohoni lyokukonga eliko, ihe onehalo tali zi momwenyo. Inamu pangela mboka ya tulwa metonatelo lyeni, ihe kaleni mu shi kuholelwa kegongalo.” (1 Pet. 5:1-3) Aakuluntugongalo Aakriste kaye na okukala ookayamukulwa, haya panga nenge haya haula aantu. Mokuholela oshiholelwa shaKristus, ngele tayu ungaunga noonzi, oye na okukala nayo nohole, oye na okukala ye ya yaalela, okukala aaifupipiki nokukala nayo nombili.

¹³ Mboka taya kwatele komeho megongalo oye li aalumentu inaaya gwanenena, noye na aluhe okukala ye shi engambeko ndyoka. (Rom. 3:23) Onkee ano, oye na okukala ya tokola toko okwiilonga kombinga yaJesus nokuholela ohole ye. Oya pumbwa okutedhatedha komukalo ngoka Kalunga naKristus hayu ungaunga naantu nokukambadhala ye ya holele. Petrus ote tu kumagidha ta ti: “Amuhe omu na okuzala eifupipiko, opo mu vule [okuyakulathana]. Oshoka enyolo otali ti: ‘Kalunga oha tondo aainenepeki, ihe oha sile ohenda aaishonopeki.’”—1 Pet. 5:5.

14. Aakuluntugongalo oye na okukala ya simaneka yalwe shi thike peni?

¹⁴ Mokuungaunga noshigunda shaKalunga, aalumentu ya langekwa po megongalo oye na okukala ye na uukwatya uuwanawa. Aaroma 12:10 otaya ti: “Kaleni mu na ohole yaamwayinathana, ne mu lalakanene okusimanekathana.” Aakuluntugongalo naayakuligongalo oye na okukala ya simaneka yalwe. Ngaashi naanaa Aakriste ayehe, aalumentu mbaka kaye na ‘okulonga nando osha mombepo yokwiihola nenge yokukonga esimano lyowala, ihe nayi ifupipike kiipala yayakwawo, yo yaa dhiladhile kutya oyo aawanawa ye ya vule.’ (Fil. 2:3) Mboka taya kwatele komeho oye na okukala ya tala ko yalwe kutya oye ya vule. Mokuninga ngaaka, aalumentu ya langekwa po otaya ka landula omayele gaPaulus ngoka taga ti: “Tse mboka twa kola meitaalo, otu na okukwatha yakwetu mboka aankundi mokuhumbata omitenge dhawo, tse twaa iyopalele tse yene. Kehe gumwe gwomutse no opalele mukwawo omuluuwanawa wamukwawo ngoka noku mu kokitha meitaalo. Oshoka Kristus ini iyopalela ye mwene.”—Rom. 15:1-3.

‘Naya simaneke aakiintu yawo’

15. Aasamane oye na okuungaunga naakulukadhi yawo ngiini?

¹⁵ Ngashingeyi natu tale komayele ngoka Petrus a pe aalumentu ya hokana. Okwa nyola a ti: “Ne wo aalumentu, mokukalathana kweni naakintu yeni omu na okutseya kutya oyo oya fa iiyuma yeloya, onkee omu na oku ya simaneka.” (1 Pet. 3:7) Okusimaneka gumwe osha hala okutya okutula omuntu ngoka pondondo yopombanda. Kungawo oto ka tala tango omaetopo, oompumbwe naashoka omuntu ngoka a hala notashi vulika wu tifuke ongele owala shila pu na etompelo lya simanenena ndyoka tali ku imbi waahe shi ninge. Omusamane osho naanaa e na okuungaunga nomukulukadhi gwe ngaaka.

16. Oohapu dhaKalunga otadhi gandja elondodho lini kaasamane shi na ko nasha nokusimaneka aakulukadhi yawo?

¹⁶ Sho Petrus a li ta lombwele aalumentu ya simaneke aakiintu yawo, okwa gwedha ko elondodho tali ti: “Opo omagalikano geni gaa piyaganekwe kusha.” (1 Pet. 3:7) Shoka otashi ulike sha yela nkene Jehova a tala ko lela omukalo ngoka omulumentu hu ungaunga nomukulukadhi gwe. Ngele okwa kala inee mu simaneka, otashi vulu okupiyaganeka omagalikano ge. Natango, mbela aakiintu ihayi inyenge nawa kunkene aasamane yawo hayu ungaunga nayo?

17. Aasamane oye na okukala ye hole aakulukadhi yawo shi thike peni?

¹⁷ Oohapu dhaKalunga odha gandja omayele kaalumentu shi na ko nasha nokuhola aakulukadhi yawo dha ti: “Aalumentu oye na okuhola aakiintu yawo, naanaa ngashika ye hole omalutu gawo yene. Oshoka kaku na ngoka e tonde olutu lwe mwene, ihe kehe gumwe ohe lu palutha nohe lu sile oshimpwiyu, naanaa ngashika Kristus ha sile egongalo lye oshimpwiyu. . . . Otashi ulike wo kutya omulumentu kehe oku na okuhola omukiintu gwe, ngashika i ihole ye mwene.” (Ef. 5:28, 29, 33) Aalumentu oye na okukala ye hole aakiintu yawo shi thike peni? Paulus okwa nyola a ti: “Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.” (Ef. 5:25) Eeno, omusamane oku na okukala e na ehalo okusila omukulukadhi gwe ngaashi naanaa Kristus a sile yalwe. Uuna omusamane Omukriste ha ungaunga nomukulukadhi gwe nohenda, nohokwe nokwaaihola mwene ohashi kala oshipu komukulukadhi a vulike kuukwamutse we.

18. Aalumentu ohaya mono ekwatho lyashike mokugwanitha po iinakugwanithwa yawo?

¹⁸ Mbela okusimaneka aakulukadhi momukalo nguka oshi li oshidhigu kaalumentu okuninga? Aawe, Jehova ke na esiku e ya pule ya ninge oshinima shi vule oonkondo dhawo. Kakele kaashono, aalongeli yaJehova oye na ompito yokumona oonkondo oonene dhi vule adhihe mewangandjo, sha hala kutya, ombepo ondjapuki ye. Jesus okwa ti: “Ne mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja Ombepo Ondjapuki kumboka taye mu indile.” (Luk. 11:13) Momagalikano gawo, aalumentu otaya vulu okupula Jehova e ya kwathele okupitila mombepo ye yu ungaunge nawa nayalwe, mwa kwatelwa naakulukadhi yawo.—Lesha Iilonga 5:32.

19. Oshitopolwa shetu tashi landula otashi ka kundathana shike?

¹⁹ Dhoshili, aalumentu oye na oshinakugwanithwa oshinene shokwiilonga nkene taya vulu okuvulika kuukwamutse waKristus nokuholela uukwamutse we. Ihe mbela ongiini kombinga yaakiintu, unene tuu aakulukadhi? Oshitopolwa tashi landula otashi ka kundathana nkene ye na okutala ko onkandangala yawo melongekidho lyaJehova.

Aakiintu, omolwashike mu na okuvulika kuukwamutse waalumentu yeni?

“Omulumentu oye omutse gwomukadhi.”—1 KOR. 11:3.

1, 2. (a) Omuyapostoli Paulus okwa nyola shike kombinga yelongekidho lyaJehova lyuukwamutse nosho lyokuvulika kuwo? (b) Omapulo geni taga ka kundathanwa moshitopolwa shika?

JEHOVA okwa tula po elandulathano ndyoka omuyapostoli Paulus a li a popi sho a nyola kutya “Kristus oye omutse gwomulumentu kehe” nosho wo kutya ‘Kalunga oye omutse gwaKristus.’ (1 Kor. 11:3) Oshitopolwa sha tetekele oshu ulike kutya Jesus okwa li u uvite kutya oshi li uuthembahenda nosho wo enyanyu kuye okuvulika kOmutse gwe, Jehova Kalunga, nosho wo kutya aalumentu Aakriste oye na omutse gwawo Kristus. Kristus okwa li omunambili, omunalukeno noka li i ihole mwene uuna tu ungaunga nayalwe. Aalumentu megongalo oye na okukala ngaaka nayalwe, unene tuu naakulukadhi yawo.

² Ongiini mbela kombinga yaakiintu? Olye omutse gwawo? Paulus okwa nyola ta ti: “Omulumentu oye omutse gwomukadhi.” Aakiintu oye na okutala ko ngiini oohapu ndhika dha nwethwa mo? Mbela ekotampango ndika otali longo natango nuuna omusamane kee shi omwiitaali? Mbela okuvulika kuukwamutse womulumentu otaku pula omukulukadhi a kale kuume itaa ti sha mondjokana uuna tapu ningwa omatokolo gontumba? Omukulukadhi oku na okuninga shike opo a tangwe?

“Otandi mu shitile omukwathi”

3, 4. Omolwashike elongekidho lyuukwamutse hali eta uuwanawa mondjokana?

³ Uukwamutse owu li elongekidho lyopakalunga. Konima sho Adam a shitwa, Jehova Kalunga okwa ti: “Inashi opala, omuntu i ikalele oye awike. Otandi mu shitile omukwathi.” Sho Eva a shitwa, Adam okwa li a nyanyukwa sho a mono omukwathi nokwa li a ti: “Ndika esipa lyomomasipa gandje nonyama yomonyama yandje.” (Gen. 2:18-24) Adam naEva oya li ye na etegameno ekumithi lyokuninga he nayina yaantu ayehe ya gwanenena, mboka ya li taya ka kala nomwenyo sigo aluhe ya nyanyukwa moparadisa ndjoka tayi ka kala kombanda yevi.

⁴ Omolwuunashipotha waavali yetu yotango, onkalo ya gwanenena moshikunino shaEden oya li ya kanithwa. (Lesha Aaroma 5:12.) Ihe elongekidho lyuukwamutse inali lunduluka. Uuna lya landulwa nawa, ohali eta uuwanawa uunene nosho wo enyanyu mondjokana. Oshizemo ohashi kala sha faathana nankene Jesus a li u uvite kombinga yokuvulika kOmutse gwe, Jehova. Manga inaa ninga omuntu gwokombanda yevi, Jesus okwa li a ‘dhanene aluhe koshipala’ shaJehova. (Omayel. 8:30) Omolwokwaahagwanenena, aalumentu itaya vulu we okukala omitse dha gwanenena, naakiintu itaya vulu wo okuvulika kuukwamutse momukalo gwa gwanenena. Uuna aasamane naakulukadhi taya tsikile okukambadhala okuninga ngaashi taya vulu, elongekidho ohali eta egwaneno mondjokana ngaashi tashi vulika pethimbo ndika.

5. Omolwashike aaihokani ye na okukaleka momitima dhawo omayele ngoka ge li mAaroma 12:10?

⁵ Shoka sha simanenena opo ondjokana yi kale tayi pondola osho kutya aaihokani oye na okutula miilonga omayele ngaka gopamanyolo ngoka ga nuninwa Aakriste ayehe taga ti: ‘Kaleni mu na ohole yaamwayinathana, ne mu lalakanene okusimanekathana.’ (Rom. 12:10) Ishewe, ayehe omusamane nomukulukadhi oye na okulonga nuudhiginini ‘ya kalathane ye na uukuume nolukeno. Ya silathane ohenda nokudhiminathana po oondjo.’—Ef. 4:32.

Uuna kuume kopandjokana kee shi omwiitaali

6, 7. Otashi vulu okweeta oshizemo shini uuna omukulukadhi Omukriste ta vulika komusamane gwe ngoka kee shi omwiitaali?

⁶ Ongiini ngele kuume koye kopandjokana ke shi omulongeli gwaJehova? Olundji, omusamane oye ha kala kee shi omwiitaali. Moshinima shika, ongiini omukulukadhi e na okuungaunga nomusamane gwe? Ombiimbeli otayi yamukula tayi ti: “Aakiintu, vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Inamu pumbwa oku shi ninga noohapu, oshoka oyo otaa ka mona, nkene omikalo dheni dha yogoka nonkene hamu simaneke Kalunga.”—1 Pet. 3:1, 2.

⁷ Oohapu dhaKalunga otadhi lombwele omukulukadhi a kale e na iikala yokuvulika komulumentu gwe ngoka kee shi omwiitaali. Eihumbato lye ewanawa otali vulu oku mu nwetha mo ye a konakone kutya oshike hashi ningitha omukulukadhi gwe a kale e na omikalo omiwanawa dha tya ngaaka. Shi li oshizemo shomikalo dhe, ohashi vulu okuningitha omusamane a konakone elongelokalunga lyomukulukadhi gwe nokonima ta taamba ko oshili.

8, 9. Oshike omukulukadhi Omukriste ta vulu okuninga ngele omusamane gwe omwiitaali iti inyenge nawa keihumbato lye ewanawa?

⁸ Oshike nduno ngele omusamane ngoka kee shi omwiitaali iti inyenge nawa? Omanyolo otaga ladhipike omukulukadhi omwiitaali a kale e na omaukwatya gopaKriste ethimbo kehe, kashi na nduno mbudhi kutya shika oshi kale oshidhigu shi thike peni. Pashiholelwa, otatu lesha mAakorinto yotango 13:4 taku ti: “Ohole ohayi idhidhimikile ayihe.” Ano oshi li nawa ngele omukiintu Omukriste ota tsikile okwiihumbata ‘neifupipiko nonuutalanteni’ nokwiidhidhimikila onkalo pahole. (Ef. 4:2) Pakwatho lyoonkondo dhaKalunga tadhi longo, sha hala okutya, ombepo ye ondjapuki, otashi wapa omuntu a dhiginine uukwatya we wopaKriste nokuli nuuna e li moonkalo oondhigu.

⁹ Paulus okwa nyola a ti: “Ayihe otandi yi vulu munguka ta koleke ndje.” (Fil. 4:13, OB-1954) Ombepo yaKalunga ohayi shi ningi tashi wapa Aakriste aaihokani ya ninge iinima oyindji mbyoka ethimbo limwe itaashi vulika yi wape okuningwa. Pashiholelwa, okuungaunga nuuhasha nakuume kopandjokana ohashi vulika shi ningithe mukwawo a kale a hala okushunithila mukwawo uuwinayi. Onkee ano, Ombiimbeli otayi lombwele Aakriste ayehe tayi ti: “Ngele ku na ngoka te mú ningile uuwinayi, inamu mu shunithila uuwinayi. . . Oshoka enyolo otali ti: ‘Egeelo olyandje, ongame mwene tandi ka geela, Omuwa osho ta ti.’ ” (Rom. 12:17-19) Aatessalonika yotango 5:15 otaye tu pe omayele ga faathana taya ti: “Kotokeni, kwaa kale nando omuntu ta galulile mukwawo uuwinayi, ihe lalakaneni aluhe okuningilathana uuwanawa noku u ningila wo aantu ayehe.” Pakwatho lyombepo ondjapuki yaJehova, shoka itaashi wapa okuningwa koonkondo dhetu yene ohashi kala tashi wapa. Kashi li tuu mondjila tu kale hatu galikana tu pewe ombepo ondjapuki yaKalunga yi tu pe shoka twa pumbwa!

10. Ongiini Jesus a li u ungaunga naamboka inaaya kala nombili naye mokupopya nomokwiihumbata kwawo?

¹⁰ Jesus okwa tula po oshiholelwa sha dhenga mbanda mokuungaunga naamboka ya li ye mu ula nenge ye mu ningile iinima iiwinayi. Petrus gwotango 2:23 okwa ti: “Oye ina tuka mboka ye mu tuku; naasho a hepekwa, ina sa ondjahi, ihe okwi inekele Kalunga, omupanguli omuyuuki.” Otatu kumagidhwa tu landule oshiholelwa she oshiwanawa. Ino geyithwa keihumbato ewinayi lyayalwe. Ngaashi Aakriste ayehe taya ladhipikwa ya ninge, natu ‘silathane ohenda nokwiifupipikilathana naangoka te tu ningile uuwinayi nenge te tu thingi katu na oku mu thinga.’—1 Pet. 3:8, 9. 

Mbela aakiintu oye na okukala ya mwena ihaaya ti sha?

11. Aakiintu yamwe Aakriste otaya ka kutha ombinga muuthembahenda uunene washike?

¹¹ Mbela okuvulika kuukwamutse womusamane okwa hala okutya aakiintu oye na okukala ya mwena ihaaya ti sha miinima yuukwanegumbo nenge miinima yilwe? Aawe, nando. Aakiintu nosho wo aalumentu oya pewa omauthembahenda ogendji kuJehova. Dhiladhila owala kombinga yoohandimwe 144 000 mboka ye na uuthembahenda woku ka kala aakwaniilwa naasaaseri megulu kohi yewiliko lyaKristus uuna ta ka pangela ombanda yevi. Omwaalu ngoka ogwa kwatela mo naakiintu. (Gal. 3:26-29) Osha yela kutya Jehova okwa pa aakiintu ompito yokuninga sha melongekidho lye lyiinima.

12, 13. Gandja oshiholelwa wu ulike kutya aakiintu oya li ya hunganeke.

¹² Pashiholelwa, pethimbo lyOmbiimbeli, aakiintu oya li ya hunganeke. Joel 2:28, 29 okwa ti: “Otandi ka tilila ombepo yandje kushaa ngoka: aana yeni aamati naakadhona otaa ku uvitha oohapu dhandje. . . . Pethimbo ndyoka otandi ka tilila ombepo yandje kombanda yaayakuli ayehe, aalumentu naakiintu.”

¹³ Aalongwa yaJesus yamwe 120 mboka ya li ya gongala mondunda yopombanda muJerusalem mesiku lyOpentekoste 33 E.N. omwa li mwa kwatelwa aakiintu nosho wo aalumentu. Ongundu ndjika ayihe oya li ya tililwa ombepo yaKalunga. Onkee ano, Petrus okwa li a vulu okupopya shoka omupolofeti Joel a li a hunganeke e ta popi oohapu ndhoka u ukitha kaalumentu nosho wo kaakiintu. Petrus okwa ti: “Shika osho shoka sha popiwa komuhunganeki Joel sho a ti: Kalunga ota ti: ‘Pomasiku gahugunina otandi ka ninga ngeyi: Otandi ka tilila Ombepo yandje maantu ayehe; aana yeni aamati naakadhona otaa ka hunganeka . . . . Eeno, maayakuli yandje ayehe, aalumentu naakiintu, otandi ka tilila mo Ombepo yandje pomasiku ngoka, oyo notaa ka hunganeka.’”—Iil. 2:16-18.

14. Aakiintu oya li ya kutha ombinga yini mokutaandelithwa kwUukwakriste wopetameko?

¹⁴ Methelemumvo lyotango, aakiintu oya li ya dhana onkandangala mokutaandelitha Uukwakriste. Oya li yu uvithile yalwe kombinga yUukwaniilwa waKalunga nokuninga iinima ya pamba iilonga mbyoka yokuuvitha. (Luk. 8:1-3) Pashiholelwa, omuyapostoli Paulus okwa li a popi Foibe kutya ota “yakula egongalo lyomuKenkrea.” Sho a li a tumu omakundo kaalongi pamwe naye, Paulus okwa li a tumbula aakiintu aadhiginini mwa kwatelwa “Trifania naTrifosa, oomboka ye li moshilonga shOmuwa.” Okwa li wo a popi “omuholike Persis, ngoka a longele Omuwa nuudhiginini.”—Rom. 16:1, 12.

15. Aakiintu ohaya dhana onkandangala yini mokutaandelitha Uukwakriste pethimbo lyetu?

¹⁵ Pethimbo lyetu, aakiintu oyo ye li oshitopolwa oshinene shaantu omamiliyona gaheyali gaamboka tayu uvitha onkundana ombwanawa yUukwaniilwa waKalunga muuyuni. (Mat. 24:14) Oyendji yomuyo oye li aalongi yethimbo lyu udha, aatumwa nosho wo iilyo yuukwanegumbo waBetel. Omupisalomi David okwi imbi ta ti: “Omuwa okwa gandja ohapu, ongundu onene yaakiintu tayi fala elaka lyesindano [nenge “onkundana ombwanawa,” NW].” (Eps. 68:11, KB) Oohapu ndhika kadhi shi tuu dhoshili! Jehova okwa lenga onkandangala ndjoka aakiintu haya dhana mokukutha ombinga kwawo mokuuvitha onkundana ombwanawa nokugwanitha po omalalakano ge. Osha yela kutya oshitegelelwa shoka aakiintu Aakriste ye na shokuvulika kuukwamutse inashi hala okutya oye na okukala ya mwena itaaya ti sha.

Aakiintu yaali mboka kaaya li ya mwena

16, 17. Ongiini oshiholelwa shaSara shu ulike kutya aakiintu kaye na okukala ookuume ya mwena itaaya ti sha mondjokana?

¹⁶ Ngele Jehova oha pe aakiintu omauthembahenda ogendji, mbela aalumentu kaye na okukala haya pula aakulukadhi yawo manga inaaya ninga etokolo lya kwata miiti? Otashi ku ulika kutya oye na uunongo ngele taye ya pula. Omanyolo oga tumbula iikando oyindji moka aakulukadhi ya li ya popi nenge ya li yi inyenge nokuli nopompito mpoka omaindilo gawo kaaga li ga talika ko kaalumentu yawo ge na oshilonga. Natu tale kaakulukadhi yaali mboka ya li ye shi ningi.

¹⁷ Sara, omukulukadhi gwatatekulululwa Abraham, okwa kala noku mu lombwela kutya na laleke omukulukadhi gwe omutiyali nomwanamati gwe molwaashoka kaye na esimaneko. “Shika osha ningitha Abraham omwenyo omwiinayi,” ihe Kalunga ka li a tsu kumwe naye. Okwa lombwele Abraham a ti: “Ino ipyakidhila nomumati nonomupika gwoye Hagar. Gwanitha shoka Sara te ku lombwele.” (Gen. 21:8-12) Abraham okwa vulika kuJehova, e ta pulakene kuSara nokuninga shoka a li a popi.

18. Abigail okwa li a ningi oonkambadhala dhashike?

¹⁸ Dhiladhila wo kombinga yaAbigail, omukulukadhi gwaNabal. Sho David a li a yi ontuku omukwaniilwa Saul, okwa li a kala ethimbo a yunga ontanda popepi nuusita waNabal. Pehala lyokukutha po omaliko gomulumentu nguka omuyamba, David naantu ye oya li ya gamene iinima ye. Ihe Nabal “okwa li inaa pwa nawa, nomugeyentu,” okwa li wo a “vavauka” naapiya yaDavid. Okwa li omulumentu “egoya.” Sho aatumwa yaDavid ya li ye mu pula e ya pe po iinima yimwe, Nabal okwa tindi. Abigail okwa li i inyenge ngiini sho u uvu shoka sha li sha ningwa po? “Okwa kutha nziya iikwiila omathele gaali, oombago ndatu dhu udha omaviinu noonzi ntano dha yothwa, oontungwa ntano dhiilya ya kangwa, omahila gomandjembele ethele nomakaka goondhiye omathele gaali” e te yi pe David naantu ye inee shi lombwela Nabal. Mbela Abigail okwa li a ningi shoka shi li mondjila? Eeno, molwaashoka Ombiimbeli otayi ti: “OMUWA okwa dhenge Nabal e ta si.” Konima David okwa ka hokana Abigail.—1 Sam. 25:3, 14-19, 23-25, 38-42.

‘Omukulukadhi ngoka e na okutangwa’

19, 20. Oshike hashi ningitha omukiintu a kale ta vulu okutangwa shili?

¹⁹ Omanyolo otaga pandula omukiintu ngoka ha longo iinima momukalo gwaJehova. Embo lyOmbiimbeli lyOmayeletumbulo olya tanga “omukulukadhi omwaanawa,” lya ti: “Omungundo gwe ogu vule omawe omanene. Omutima gwomulumentu gwe ohagu mu inekele, ye ita pumbwa omaliko. Omulumentu gwe ohe mu ningile uuwanawa, hauwinayi, omasiku agehe gokukalamwenyo kwe.” Oya gwedha ko tayi ti: “Okana ke ote ka makulile oohapu dhowino nokelaka lye oku na enongeko lyuukuume. Oha tonatele nawa iilonga yomegumbo lye noiha li oshikwiila shonyalo. Oyanamati otaa thikama e taa tumbula elago lye; omulumentu gwe wo ote mu tanga.”—Omayel. 31:10-12, 26-28.

²⁰ Oshike hashi ningitha omukiintu a kale ta vulu okutangwa shili? Omayeletumbulo 31:30 otaga ti: “Oshuuluko shomukiintu kashi shi kwiinekelwa nuumbweshukile ohau yonuka; omukulukadhi ngoka ha tila OMUWA, oku na okutangwa.” Mokukala ha tila Jehova omwa kwatelwa wo okukala ha vulika nehalo kelongekidho lyopakalunga lyuukwamutse. “Omulumentu oye omutse gwomukadhi,” ngaashi owala “Kristus oye omutse gwomulumentu kehe naKalunga oye omutse gwaKristus.”—1 Kor. 11:3.

Kala wu na olupandu lwomagano ngoka wa pewa kuKalunga

21, 22. (a) Omatompelo gashike Aakriste ya hokana ye na gokukala ya pandula Kalunga omolwomagano gondjokana? (b) Omolwashike tu na okukala twa simaneka elongekidho lyaJehova lyuunamapangelo nosho wo uukwamutse? (Tala oshimpungu pombanda.)

²¹ Uuna Aakriste ya hokana, oye na omatompelo ogendji okupandula Kalunga. Otaya vulu okukala taye ende yi ikwata moonyala ye li aaihokani ya nyanyukwa. Unene tuu otaya vulu okukala ye na olupandu lwomagano ga za kuKalunga ga lalekwa nuuyamba gondjokana, molwaashoka ohashi ya pe ompito ya hangane nokweenda pamwe naJehova. (Rut 1:9; Mika 6:8) E li Omutotipo gwondjokana, oku shi nawa shoka sha pumbiwa opo ondjokana yi kale yi na enyanyu. Aluhe kaleni hamu longo kehe shimwe momukalo ngoka a hokwa, ‘nenyanyu ndyoka OMUWA te li gandja otali ke mú kumika’ nokuli nomuuyuni mbuka wa kolokosha.—Neh. 8:10.

²² Omusamane Omukriste ngoka e hole omukulukadhi gwe ngaashi i ihole ye mwene ota ka longitha uukwamutse we momukalo gwolukeno. Omukulukadhi gwe omutilikalunga ota ka kala a gwana okukala e holike kuye, molwaashoka ota ka kala e li omukwathi kuye nota ka kala e mu simaneka. Oshinima shoka sha simanenena kwaayihe osho kutya ondjokana yawo yi shi okuholelwa otayi ka kala tayi simanekitha Kalunga ketu Jehova ngoka a gwana okusimanekwa.