Methelemumvo lyotango, Andreas oye gumwe gwomwaamboka ya li ya dhimbulula tango kutya Jesus oye Kristus. Andreas okwa li a lombwele lye nziya oshinima shono? “Andreas okwa tsakaneke tangotango omumwayina Simon nokwe mu lombwele a ti: ‘Otse otwa mono Kristus nokutya Omugwayekwa.’” Andreas okwa fala Petrus kuJesus, naashono osha li sha pe Petrus ompito a ninge omulongwa gwaJesus. — Joh. 1:35-42.

Oshike tatu ilongo momukalo ngoka Andreas naKornelius ya li yu ungaunga naakwanezimo yawo?

Andreas naKornelius kapu na nando ogumwe gwomuyo a li e shi etha a tegelele ompito yilwe. Andreas oye mwene a li a tseyitha Petrus kuJesus, naKornelius okwa li a ningi omalongekidho opo aakwanezimo ye ya pulakene kwaashoka Petrus ta ti. Ihe Andreas naKornelius inaya thiminika nando aakwanezimo yawo nenge ya kambadhale miineya ye ya ningithe ya ninge aalanduli yaKristus. Mbela moshinima shika omu na oshiilongomwa sha sha? Oshi li nawa tu katuke momukalo gwa faathana. Otashi vulika tu kale tatu vulu okukundathana naakwanezimo yetu uuyelele wontumba nokukonga oompito opo yu uve ooshili dhOmbiimbeli noya tseyathane nooitaali ooyakwetu. Ihe natango, otu na okusimaneka emanguluko lyawo lyokuninga omatokolo nokuyanda oku ya thiminika. Opo tu tale nkene tu na okukwathela aakwanezimo yetu, natu ka tale koshiholelwa shaJürgen naPetra, aaihokani yokoNdowishi.