19, 20. Ethaneko lini Jesus a gandja opo u ulike kutya iilonga yokuuvitha oye endelela?

¹⁹ Omukalo omutitatu, Jesus okwa li a tala ko uukalele wu li oshinima she endelela. Shino okwa li e shi ulike sho a popi nomukiintu Omusamaria pomuthima puSikar. Aalongwa yaJesus kaya li ye wete she endelela okuuvithila yalwe onkundana ombwaanawa. Okwa ti kuyo: “One ohamu ti: ‘oku na natango oomwedhi ne, eteyo li thike.’ Ongame otandi mú lombwele: Yelutheni omeho geni, mu tale kutya omapya oga thika okuteywa.” — Johannes 4:35.

²⁰ Jesus okwa li a longitha ethaneko li ikolelela kethimbo lyomumvo moka ye li opo e ya kwathele. Ethimbo ndyoka olya li omwedhi gwOshijuda Chislev (Novomba/Desemba). Eteyo ndyoka hali tameke lwopethimbo lyOpaasa ndjoka hayi dhanwa mo 14 Nisan, olya li owala li na ko oomwedhi ne. Aanamapya kaya li ye wete eteyo lya thika pethimbo mpoka, molwaashoka okwa li ku na ethimbo olindji natango. Ihe ongiini kombinga yeteyo lyopambepo? Aantu oyendji oya li ya hala okuuva, okwiilonga, okuninga aalongwa yaKristus noku ka mona etegameno ekumithi ndyoka Jehova e ya pungulila. Jesus okwa li e wete kutya epya lyopathaneko oli na okuteywa molwaashoka ethimbo olya thika.c Olya li ethimbo lyiilonga mbyoka ye endelela. Sho aantu yomoshilando shimwe ya li ya hala Jesus a kale puyo, okwe ya lombwele a ti: “Ondi na okuuvithila wo iilando yimwe evaangeli lyuukwaniilwa waKalunga, oshoka olyo tuu ndyoka nde li tuminwa.” — Lukas 4:43, KB.